ខ្សែប្រយុទ្ធ Real Madrid ត្រូវបានដកចេញពីក្រុមជម្រើសជាតិបារាំង អំឡុងព្រឹត្តិការណ៍ World Cup ក្នុងប្រទេសកាតា ដោយសារតែរងរបួសសាច់ដុំភ្លៅខាងឆ្វេង។ ក្រោយទទួលបានការបញ្ជាក់ពីបញ្ហារបួស Benzema បានចាកចេញពីក្រុមភ្លាមៗ ដែលកំពុងហ្វឹកហាត់ត្រៀមការប្រកួត។
 

អំឡុង World Cup ខ្សែប្រយុទ្ធម្ចាស់ពាន Ballon d’Or ១សម័យ Benzema បានវិលចូលហ្វឹកហាត់វិញជាមួយក្រុម Real Madrid ក្នុងថ្ងៃទី១០ ខែធ្នូ ពោលគឺ៤ថ្ងៃមុនការប្រកួតបារាំងទល់ក្រុមម៉ារ៉ុកវគ្គពាក់កណ្តាលផ្តាច់ព្រ័ត្រ។
 

លោក Deschamps គ្រូបង្វឹកក្រុមជម្រើសជាតិបារាំង ដែលកំពុងរងការរិះគន់ច្រើននាពេលបច្ចុប្បន្ន ចំពោះការដឹកនាំ បាននិយាយប្រាប់កាសែត Parisien ក្នុងកិច្ចសម្ភាសជាសាធារណៈ កាលពីថ្ងៃទី១១ មីនា ថា Benzema បានប្រាប់លោកថាគេមិនអាចត្រៀមខ្លួនរួចរាល់ឡើយសម្រាប់ការប្រកួត World Cup។
 

«Karim ប្រាប់ខ្ញុំថារូបគេមិនទាន់ត្រៀមខ្លួនរួចរាល់ឡើយ នៅពេលដែល Karim រងរបួស ក្រុមគ្រូពេទ្យរបស់យើងប្រាប់រូបគេឱ្យទៅកាន់មន្ទីពេទ្យដើម្បីពិនិត្យ។ Karim បានផ្តល់លទ្ធផលពិនិត្យទៅកាន់មនុស្សម្នាក់ដែលមកតាមពីទីក្រុង Madrid ហើយក៏ជាអ្នកផ្តល់ជម្រើសដល់រូបគេ នៅពេលគេវិលមកកាន់សណ្ឋាគាវិញ រូបគេក៏បានរៀបចំអីវ៉ាន់ចាកចេញនៅពាក់កណ្តាលយប់។ ខ្ញុំក៏បានជួប Karim ប្រហែល ២០ និងបានជជែកពីលទ្ធផលនៃការធ្វើតេស្តនោះ»។
 

ឆ្លើយតបទៅនឹងការលើកឡើងរបស់លោក Deschamps ខ្សែប្រយុទ្ធវ័យ ៣៥ឆ្នាំ បានបង្ហោះសារនៅលើបណ្តាញសង្គម Instagram ខ្លួនថាគ្រូបង្វឹកក្រុមជម្រើសជាតិបារាំង និយាយថាកុហកចំពោះបញ្ហារបួសរបស់គេរហូតរូបគេមិនអាចលេងក្នុង World Cup បាន។
 

«ប៉ុន្តែអ្វីជាការពិត នោះគឺអ្នកកុហក អ្នកជាមនុស្សកុហក។»។ នេះជាអ្វីដែល Benzema បានសរសេរបែបនេះនៅលើ Instagram។

ក្រោយក្រុមបារាំងបានប្រកួតចាញ់អាហ្សង់ទីននៅវគ្គផ្តាច់ព្រ័ត្រ World Cup 2022 Benzema បានប្រកាសចូលនិវត្តន៍ពីក្រុមជម្រើសជាតិ ស្របពេលខកចិត្តនឹងរឿងរ៉ាវមិនបានជួយក្រុម និងបញ្ហាចម្រូងចម្រាស់ជាមួយគ្រូបង្វឹក។