ក្រោមវិធានការថ្មី ចិននឹងចាប់ផ្ដើមផ្ដល់ទិដ្ឋាការថ្មីចាប់ពីពាក់កណ្ដាលខែមីនា។ ចំណែកអ្នកដែលមានទិដ្ឋាការចេញមុនថ្ងៃទី២៨ ខែមីនា ហើយនៅមានសុពលភាព អាចធ្វើដំណើរទៅចិនបាន។ លើសពីនេះ ចិនក៏ចាប់ផ្ដើមអនុវត្តឡើងវិញការទៅដល់ដោយមិនមានទិដ្ឋាការអ្នកដំណើរតាមនាវាកម្សាន្តទៅដល់សៀងហៃ និងសម្រាប់ទេសចរណ៍ជាក្រុមពីហុងកុង និងប្រទេសអាស៊ានមួយចំនួន។

 

ក្រោយការផ្ទុះជំងឺកូវីដ-១៩ នៅចុងឆ្នាំ២០១៩ ចិនបានរឹតត្បិតយ៉ាងខ្លាំងលើការធ្វើដំណើរចេញចូលទឹកដីរបស់ខ្លួន។ ខណៈដែលប្រទេសនានាលើពិភពលោកចាប់ផ្ដើមបន្ធូរបន្ថយវិធានការរឹតបន្តឹងដើម្បីសម្រួលសកម្មភាពសេដ្ឋកិច្ច ចិននៅតែពង្រឹងវិធានការរបស់ខ្លួនក្រោមគោលនយោបាយមិនមានកូវីដ-១៩ រហូតដល់ខែធ្នូ ឆ្នាំ២០២២ ។ កាលនោះ ចិនប្រកាសទម្លាក់ចោលស្ទើរទាំងស្រុងចំណាត់ការដ៏តឹងរ៉ឹងរបស់ខ្លួន ហើយអនុញ្ញាតឱ្យប្រជាជនធ្វើដំណើរដោយមិនមានការរាំងស្ទះអ្វីឡើយ។

 

បើតាមទិន្នន័យអង្គការទេសចរណ៍ពិភពលោក ចិនទទួលអ្នកទេសចរអន្តរជាតិជាង៦៥លាននាក់នៅឆ្នាំ២០១៩ ពោលគឺមុនផ្ទុះជំងឺកូវីដ-១៩។ 

 

ការបន្តសម្រួលចរន្តទេសចរ នឹងជួយជំរុញសេដ្ឋកិច្ចចិនដែលកំពុងមានកំណើនថយចុះ។ នៅឆ្នាំ២០២២ កំណើនសេដ្ឋកិច្ចមាន៣ភាគរយប៉ុណ្ណោះ ដែលទាបជាងផែនការ៥,៥ភាគរយ។ នៅឆ្នាំ២០២៣ ចិនដាក់ផែនការសម្រេចកំណើនសេដ្ឋកិច្ចជុំវិញ៥ភាគរយ។ ប៉ុន្តែនាយករដ្ឋមន្រ្តីចិនថ្មី លី ឈាំង និយាយថា ការសម្រេចបានកំណើនខ្ពស់បែបនេះ មិនមែនជារឿងងាយស្រួលឡើយ៕