នៅក្នុងសេចក្ដីសម្រេច ដែលចុះហត្ថលេខាដោយប្រមុខរដ្ឋាភិបាលកម្ពុជា  គណៈកម្មការអន្តរក្រសួងនេះ  មានលោក ថោង ខុន រដ្ឋមន្រ្តីក្រសួងទេសចរណ៍ ជាប្រធាន លោក គួច ចំរើន អភិបាលខេត្តព្រះសីហនុ ជាអនុប្រធាន ព្រមទាំងមានមន្រ្តីជាន់ខ្ពស់ចំនួន៦នាក់ ដែលមកពីក្រសួងទេសចរណ៍ ក្រសួងសុខាភិបាល ក្រសួងវប្បធម៍ និងវិចិត្រសិល្បៈ រដ្ឋលេខាធិការដ្ឋានអាកាសចរស៊ីវិល ជាអនុប្រធាន និងជាអនុប្រធានអចិន្រ្តៃយ៍ ។ រីឯ មន្រ្តីមកពី អគ្គស្នងការដ្ឋាននគរបាលជាតិ  កងរាជអាវុធហត្ថលើផ្ទៃប្រទេស និងកងទ័ពជើងទឹក ចំនួន៥នាក់ ជាសមាជិក។ 
 

ក្នុងសេចក្ដីសម្រេចដដែល គណៈកម្មការអន្តរក្រសួងនេះ មានតួនាទី និងភារកិច្ចដឹកនាំ ចាត់ចែង និងត្រួតពិនិត្យដំណើរការរៀបចំកិច្ចប្រជុំការងារទេសចរណ៍លើកទី៥១ និងវេទិកាទេសចរណ៍មេគង្គ ឆ្នាំ២០២៣ ឱ្យមានប្រសិទ្ធភាព និងទទួលបានជោគជ័យ។
 

គណៈកម្មការអន្តរក្រសួង មានសិទ្ធបង្កើតលេខាធិការដ្ឋានមួយជាសេនាធិការ និងអនុគណៈកម្មការមួយចំនួនតាមការចាំបាច់ ដោយសេចក្ដីសម្រេចរបស់ប្រធានគណៈកម្មការអន្តរក្រសួង។ 
 

ជាមួយគ្នានេះ គណៈកម្មការខាងលើ ក៏មានសិទ្ធប្រើប្រាស់ថវិការបស់ក្រសួងទេសចរណ៍ និងប្រភពថវិកាស្របច្បាប់ផ្សេងៗទៀត ដើម្បីដំណើរការការងារ និងមានសិទ្ធស្វែងរកដៃគូអភិវឌ្ឍន៍ ឬផ្នែកឯកជន ដើម្បីជួយទ្រទ្រង់ និងឧបត្ថម្ភដល់ដំណើរការរៀបចំកិច្ចប្រជុំការងារទេសចរណ៍លើកទី៥១ និងវេទិការទេសចរណ៍មេគង្គឆ្នាំ២០២៣។ គណៈកម្មការអន្តរក្រសួងនេះ នឹងត្រូវរំសាយក្រោយចប់ភារកិច្ច៕