អន្តរជាតិ
រដ្ឋមន្ត្រីការបរទេសកុំមិនវែលដូមីនិក នឹងបំពេញទស្សនកិច្ចកម្ពុជាលើកដំបូង ពីថ្ងៃទី២២-២៤មីនា
×![]()
ដោយ: ខន ចំប៉ា
លោក វីន ហេនដឺសាន់ (Vince Henderson) រដ្ឋមន្ត្រីការបរទេសធុរកិច្ចអន្តរជាតិ ពាណិជ្ជកម្ម និងថាមពល នៃប្រទេសកុំមិនវែលដូមីនិក នឹងមកបំពេញទស្សនកិច្ចផ្លូវការនៅកម្ពុជា ពីថ្ងៃទី២២-២៤ មីនា ឆ្ន២០២៣។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយនៅថ្ងៃទី២១ ខែមីនាឆ្នាំ២០២៣នេះ។
ក្រសួងការបរទេសកម្ពុជាបញ្ជាក់ទៀតថា ក្នុងអំឡុងទស្សនកិច្ចនៅកម្ពុជាលើកដំបូងនេះ លោក វីន ហេនដឺសាន់ នឹងចូលរួមសម្តែងការគួរសម ជាមួយសម្តេច ហ៊ុន សែន នាយករដ្ឋមន្ត្រីកម្ពុជា។
លោក វីន ហេនដឺសាន់ ក៏នឹងជួបប្រជុំទ្វេភាគីជាមួយ លោក អ៊ុច បូររិទ្ធ រដ្ឋមន្ត្រីស្តីទីនៃក្រសួងការបរទេសកម្ពុជា និងជារដ្ឋមន្ត្រីប្រតិភូអមនាយករដ្ឋមន្ត្រី ដោយភាគីទាំង២ នឹងពិភាក្សាគ្នាលើវិស័យផ្សេងៗនៃកិច្ចសហប្រតិបត្តិការទ្វេភាគី តំបន់ និងអន្តរជាតិ។ នេះបើតាមសេចក្តីប្រកាសព័ត៌មានដដែល ដោយបានបន្តថា បន្ទាប់ពីជំនួបនេះ ភាគីទាំង២ នឹងចុះហត្ថលេខាលើកិច្ចព្រមព្រៀងរវាងរដ្ឋាភិបាលនៃប្រទេសទាំង២ ស្តីពីការលើកលែងទិដ្ឋការសម្រាប់អ្នកកាន់លិខិតឆ្លងដែនការទូត និងផ្លូវការ។
ក្រសួងការបរទេសកម្ពុជា ចាត់ទុកថាដំណើរទស្សនកចិ្ចជាលើកដំបូង របស់រដ្ឋមន្ត្រីការបរទេសដូមីនិក លោក វីន ហេនដឺសាន់ មកកម្ពុជា នឹងពង្រឹងបន្ថែមទៀតនូវទំនាក់ទំនងការទូត និងពង្រីកកិច្ចសហប្រតិបត្តិការរវាងប្រទេសទាំង២៕
© រក្សាសិទ្ធិដោយ thmeythmey.com
