សម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ និងជាប្រធានគណៈបញ្ជាការដឹកនាំយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកឡើងថា បច្ចុប្បន្ន អាជ្ញាធរ គ្រាន់តែស្មានប៉ុណ្ណោះថា អ្នកសេពគ្រឿងញៀននៅកម្ពុជា មានចំនួននេះឬប៉ុណ្ណោះ តែពុំបានសិក្សារកឲ្យឃើញចំនួនជាក់លាក់នោះទេ។ សម្តេច ជំរុញឲ្យស្ថាប័នបង្ក្រាបគ្រឿងញៀន សហការជាមួយអាជ្ញាធរមូលដ្ឋាន ដើម្បីធ្វើស្ថិតិអំពីជនរងគ្រោះ ដែលប្រើប្រាស់គ្រឿងញឿនៅទូទាំងប្រទេស ដោយការប្រមូលស្ថិតិនេះ ត្រូវចាប់ផ្តើមពីថ្នាក់ភូមិឡើងទៅ។
 

ធ្វើជាអធិបតីក្នុងកិច្ចប្រជុំបូកសរុបលទ្ធផលនៃការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៧ កាលពីថ្ងៃទី២២ ខែមីនា ឆ្នាំ២០២៣ សម្តេចរដ្ឋមន្រ្តី មានប្រសាសន៍ដូច្នេះថា៖«ឲ្យមេភូមិរាយការណ៍មក ក្នុងភូមិហ្នឹង មានប៉ុន្មាននាក់ ដែលប្រើប្រាស់គ្រឿងញៀន។ មនុស្សប៉ុន្មាននាក់ក្នុងភូមិរបស់គាត់ [មិនដែល] ក្តាប់មិនបាន។ អ៊ីចឹងប្រមូលព័ត៌មានពីភូមិ ពីឃុំ ពីស្រុក ពីខេត្តមក យើង ឃើញមានប៉ុន្មានហើយ។ វា មិនត្រូវ១០០ភាគរយទេ តែវា ប្រាកដប្រជាជាងយើងស្មាន»។ 
 

យោងតាមរបាយការណ៍ ក្នុងចំណោមអ្នកជាប់ឃុំទាំងអស់នៅកម្ពុជានាពេលបច្ចុប្បន្ន មានប្រមាណ៣,៨ម៉ឺននាក់ ដោយក្នុងនោះ គ្រាន់តែអ្នកពាក់ព័ន្ធនឹងគ្រឿងញៀន មានដល់ទៅជាង៥០ភាគរយ៕