អន្តរជាតិ
រដ្ឋមន្ត្រីការបរទេសហុងឌូរ៉ាសទៅចិនដើម្បីជំរុញការភ្ជាប់ទំនាក់ទំនងការទូត
× រដ្ឋមន្ត្រីការបរទេសហុងឌូរ៉ាស Eduardo Enrique Reina បានធ្វើដំណើរទៅកាន់ចិនដែលជាទស្សនកិច្ចមួយនឹងអាចឈានដល់ការបញ្ចប់ទំនាក់ទំនងដ៏យូរអង្វែងជាមួយកោះតៃវ៉ាន់។ តៃវ៉ាន់ឯណោះ ក៏កោះហៅអគ្គរដ្ឋទូតហុងឌូរ៉ាសដើម្បីបង្ហាញការមិនពេញចិត្ត។
«រដ្ឋមន្ត្រីការបរទេស Eduardo Enrique Reina តាមការណែនាំរបស់ប្រធានាធិបតី Xiomara Castro បានធ្វើដំណើរទៅកាន់ចិនកាលពីថ្ងៃទី២២ ខែមីនា ដើម្បីលើកកម្ពស់កិច្ចខិតខំសម្រាប់ការបង្កើតទំនាក់ទំនងការទូត»។ នេះជាការបញ្ជាក់របស់លេខាធិការសារព័ត៌មានរបស់ប្រធានាធិបតី Ivis Alvarado។
ប្រសិនជាការផ្លាស់ប្តូរនេះកើតឡើង ដង្ហើមការទូតរបស់កោះតៃវ៉ាន់នឹងកាន់តែខ្សត់ ហើយនឹងនៅមានទំនាក់ទំនងការទូតតែជាមួយប្រទេសចំនួន១៣ប៉ុណ្ណោះ។ កាលពីសប្តាហ៍មុន ប្រធានាធិបតីហុងឌូរ៉ាស Xiomara Castro បានបង្ហោះសារលើបណ្ដាញសង្គម Twitter ជាមួយនឹងបំណងស្វែងរកការបើកចំហទំនាក់ទំនងជាមួយក្រុងប៉េកាំងផងដែរ។
ទាក់ទងរឿងនេះ អ្នកនាំពាក្យក្រសួងការបរទេសចិនលោក Wang Wenbin បាននិយាយថា ទីក្រុងប៉េកាំង បានស្វាគមន៍ចំពោះអាកប្បកិរិយាវិជ្ជមានរបស់រដ្ឋាភិបាលហុងឌូរ៉ាសចំពោះការកសាងទំនាក់ទំនងទ្វេភាគី ហើយមានឆន្ទៈក្នុងការអភិវឌ្ឍទំនាក់ទំនងនេះដោយផ្អែកលើសមភាព និងការគោរពគ្នាទៅវិញទៅមក។
ក្រសួងការបរទេសរបស់កោះតៃវ៉ាន់ឯណោះ ក៏បានកោះហៅអគ្គរដ្ឋទូតហុងឌូរ៉ាសដើម្បីបង្ហាញពីការមិនពេញចិត្តយ៉ាងខ្លាំងរបស់ខ្លួននៅក្នុងដំណើរទស្សនកិច្ចដែលបានធ្វើឱ្យប៉ះពាល់ដល់អារម្មណ៍របស់រដ្ឋាភិបាល និងប្រជាជនតៃវ៉ាន់យ៉ាងធ្ងន់ធ្ងរ។
លើសពីនេះ ហុងឌូរ៉ាសបានបដិសេធពីការចោជុំវិញការទាមទារជំនួយចំនួន២,៥ពាន់លានដុល្លារពីតៃវ៉ាន់មុនពេលការប្រកាសរបស់ខ្លួនដើម្បីស្វែងរកការបើកចំហទំនាក់ទំនងជាមួយចិន។ ជំនួសមកវិញ ហុងឌូរ៉ាសអះអាងថា ខ្លួនបានស្នើសុំម្តងហើយម្តងទៀតឱ្យតៃវ៉ាន់ទិញបំណុលសាធារណៈរបស់ខ្លួន៕
© រក្សាសិទ្ធិដោយ thmeythmey.com