លោក ប្រាក់ សុខុន បានទៅបំពេញទស្សនកិច្ចនៅអេហ្ស៊ីប ពីថ្ងៃទី២៩ ដល់ថ្ងៃទី៣០ខែមីនា ឆ្នាំ២០២៣។ ខ្លឹមសារអំពីដំណើរទស្សនកិច្ចនេះ ត្រូវបានផ្សព្វផ្សាយតាមរយៈសេចក្តីប្រកាសព័ត៌មានរបស់ក្រសួងការបរទេសកម្ពុជា។ 
 

ដំណើរទស្សនកិច្ចរបស់លោក ប្រាក់ សុខុន ត្រូវបានធ្វើឡើងស្របនឹងខួប៧០ឆ្នាំនៃទំនាក់ទំនងការទូតកម្ពុជា-អេហ្ស៊ីប។ លោក ប្រាក់ សុខុន និងលោក សាម៉េ ស៊ូគ្រី ឯកភាពគ្នាថា នឹងពិចារណាបង្កើតកិច្ចពិគ្រោះយោបល់រវាងក្រសួងការបរទេសទាំង២។ លោករដ្ឋមន្រ្តីទាំង២ យល់ថា យន្តការពិគ្រោះយោបល់នេះ គឺជាវិធី និងជាមធ្យោបាយ ដើម្បីពង្រឹងកិច្ចសហប្រតិបត្តិការជាមួយគ្នាលើគ្រប់វិស័យ។ 
 

ជាមួយគ្នានេះ ភាគីទាំង២ បានចុះហត្ថលេខាលើអនុស្សារណៈយោគយល់គ្នាចំនួន៣ គឺ អនុស្សារណៈស្តីពីកិច្ចសហប្រតិបត្តិការវប្បធម៌ អនុស្សារណៈស្តីពីកិច្ចសហប្រតិបត្តិការផ្នែកបុរាណវិទ្យា សារមន្ទីរ និងបតិភណ្ឌ និងអនុស្សារណៈស្តីពីកិច្ចសហប្រតិបត្តិការរវាងវិទ្យាស្ថានជាតិការទូត និងទំនាក់ទំនងអន្តរជាតិកម្ពុជា ជាមួយវិទ្យាស្ថានសិក្សាការទូតអេហ្ស៊ីប៕