លោក យី វាសនា អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ (CAMAPGOC)  ក្នុងជំនួបកិច្ចប្រជុំនាយបេសកម្ម រួមជាមួយ Asian Para Sports Federation(APSF) ​នៅ​​ថ្ងៃទី៣០ ខែមីនា ឆ្នាំ២០២៣ បានសម្រេចបន្ថែមកីឡាមួយចំនួនទៀតដែលកើនដល់១៣កីឡានៅប៉ារ៉ាហ្គេម ដោយក្នុងនោះក៏មានកីឡាអេឡិចត្រូនិកផងដែរ។ 

 

កីឡាទាំង១៣ ប្រភេទដែលបានដាក់បញ្ចូលរួមមាន៖ អត្តពលកម្ម ហែលទឹក លើកទម្ងន់ វាយកូនឃ្លីលើតុ វាយសី បាល់បោះអង្គុយលើរទេះ បាល់ទាត់ជនពិការចលករខួរក្បាល បាល់ទាត់ជនពិការភ្នែក បាល់បោះជនពិការភ្នែក បាល់ទះអង្គុយ ប៊ូស្យា អុក យូដូ និង​កីឡា​អេឡិចត្រូនិក។ ចំពោះកីឡាអេឡិចត្រូនិក​ ជាប្រភេទកីឡា​ដែល​បង្ហាញ​​ខ្លួនលើក​ដំបូង​ ក្នុងការប្រកួតកីឡាអាស៊ានប៉ារ៉ាហ្គេមលើកទី១២ ដែលកម្ពុជាធ្វើម្ចាស់ផ្ទះ។
 

យ៉ាងណាក៏ដោយ ការប្រកួតប្រជែងក្នុងប្រភេទកីឡាអេឡិចត្រូនិក​ នឹងមិនមានការផ្តល់មេដាយនោះទេ ដោយដាក់ជាកីឡាបង្ហាញ (Demo) ប៉ុណ្ណោះ។

គួបញ្ជាក់ថា ការប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ នៅប្រទេសកម្ពុជា នឹងបើកដំណើរការពីថ្ងៃទី៣-៩ ខែមិថុនា ឆ្នាំ២០២៣ ដោយមានអត្តពលិកចំនួន៣០០០នាក់មកពីបណ្តាប្រទេសជាសមាជិកសមាគមអាស៊ាន បូករួមទាំងទីម័រខាងកើតផងដែរ៕