នាយកប្រចាំប្រទេស និងនាយកគម្រោងអភិវឌ្ឍន៍កុមារតូច នៃវិទ្យាស្ថានស្រាវជ្រាវត្រីកោណ អន្ដរជាតិ លោក ចន វីលៀម អាមេស បានឱ្យដឹងថា យុទ្ធនាការផ្លាស់ប្ដូរឥរិយាបថសហគមន៍ក្រោមប្រធានបទ ប្ដីខ្ញុំល្អ កូនខ្ញុំឆ្លាត ជាសកម្មភាពមួយរបស់យុទ្ធនាការគម្រោងអភិវឌ្ឍន៍កុមារតូច (IECD)។ ក្នុងពិធីប្រកាសអនុវត្តន៍ជាផ្លូវការគម្រោងដែលរៀបចំនៅថ្ងៃទី១ មេសា លោក  ចន វីលៀម អាមេស  បញ្ជាក់ថា កម្មវិធីនេះមានបំណងជួយកុមារតូចកម្ពុជាឱ្យមានការលូតលាស់ផ្នែករាងកាយ បញ្ញាការគិត ភាសា និងសង្គមអារម្មណ៍ឱ្យបានល្អប្រសើរ។

 

លោកស្រី ថុន ស៊ីណា អនុប្រធានមន្ទីរអប់រំ យុវជន និងកីឡា និងជាសមាជិកា គណៈកម្មាធិការ ពិគ្រោះយោបល់កិច្ចការស្រ្តី និងកុមារ ខេត្តសៀមរាប បានលើកឡើងថា យុទ្ធនាការនៃកម្មវិធី ប្ដីខ្ញុំល្អ កូនខ្ញុំឆ្លាត ជាគន្លឹះក្នុងការកាត់បន្ថយការប្រកាន់តួនាទីផ្សេងគ្នា រវាងបុរស និងស្រ្តីក្នុងការថែទាំកុមារ ដែលជះឥទ្ធិពលខ្លាំង និងជាផ្នត់គំនិតសង្គមដ៏សំខាន់ក្នុងសង្គមខ្មែរ ដែលបានកំណត់តួនាទីនេះតាំងពី​យូរលង់មក គឺការថែទាំកូនតូចៗ និងកិច្ចការផ្សេងៗជាភារកិច្ចរបស់ស្រ្តីជាម្ដាយ។

 

លោកស្រី ថុន ស៊ីណា បន្ថែមថា៖« ឪពុកក៏ធ្វើបានដែរ បានល្អជាងម្ដាយទៅទៀត ហើយម្យ៉ាងវិញទៀត នៅពេលឪពុកផ្លាស់ប្ដូរតួនាទីមកជួយដល់កូនតូចៗ គាត់មានភាពស្និទ្ធស្នាលជាមួយកូនបានច្រើន»។

 

ពលរដ្ឋមកពីឃុំព្រះដាក់ ស្រុកបន្ទាយស្រី អ្នកស្រី ទូច សុភាព ចាប់អារម្មណ៍ចំពោះយុទ្ធនាការ ប្ដីខ្ញុំល្អ កូនខ្ញុំឆ្លាត។ អ្នកស្រីយល់ថា សព្វថ្ងៃបុរសជាស្វាមីបានជួយការងារថែទាំកូនបានមួយផ្នែក ដែលជាការ សម្រាលបន្ទុកស្រ្ដីជាភរិយា។ សម្រាប់អ្នកស្រី សុភាព ការផ្លាស់ប្ដូរឥរិយាបថដូច្នេះ ជួយឱ្យគ្រួសារ កាន់តែមានភាពកក់ក្ដៅ សុភមង្គលមួយកម្រិតទៀត។

 

គួរបញ្ជាក់ថា យុទ្ធនាការផ្លាស់ប្ដូរឥរិយាបថសហគមន៍ក្រោមប្រធានបទ ប្ដីខ្ញុំល្អ កូនខ្ញុំឆ្លាត ដែលជាសកម្មភាពមួយរបស់យុទ្ធនាការ គម្រោងអភិវឌ្ឍន៍កុមារតូច ទទួលបានមូលនិធិគាំទ្រពី ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្ដរជាតិ (USAID)  ដែលដឹកនាំអនុវត្តន៍ដោយ​វិទ្យាស្ថានស្រាវជ្រាវត្រីកោណ សហការជាមួយអង្គការ ហេឡែន ខេលល័រ អន្ដរជាតិ (Helen Keller Intl) និងអង្គការសេហ្វហេវិន៕