ភ្នំពេញ៖ ឆ្នាំនេះខេត្តកំពង់ស្ពឺ នឹងរៀបចំកម្មវិធីប្រណាំងរទេះសាឡីគោលឿន នៅថ្ងៃទី២ ខែមេសា ឆ្នាំ២០២៣ ដោយទទួលបានគោចូលរួមប្រកួត ចំនួន៣៩នឹម។ លោក ស៊ុន មានជ័យ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ស្ពឺ មើលឃើញថា ឆ្នាំនេះនឹងមានអ្នកចូលរួមទស្សនា ច្រើនជាងឆ្នាំមុនទ្វេដង។
ក្នុងកិច្ចសម្ភាសជាមួយសារព័ត៌មានថ្មីៗ លោក ស៊ុន មានជ័យ បង្ហាញក្តីរំពឹថា នឹងទទួលបានអ្នកចូលទស្សនា ច្រើនកុះករជាងឆ្នាំមុន ដ្បិតកម្មវិធីធ្វើចំថ្ងៃឈប់សម្រាក ហើយទីតាំងប្រារព្ធកម្មវិធី នៅជាប់ផ្លូវធំ ដែលអំណោយផលដល់ការចូលទស្សនាផង។
លោក ស៊ុន មានជ័យ បញ្ជាក់បន្ថែម៖«យើងធ្វើនៅជាប់ផ្លូវធំ ដូច្នេះយើងរំពឹងថាមានអ្នកចូលទស្សនាច្រើនជាងមុន។ ដោយឡែកបើយើងមើលទៅលើការចាប់អារម្មណ៍ របស់មហាជនលើផេករបស់មន្ទីរវប្បធម៌ ដែលយើងបានផុស គឺឆ្នាំនេះមានអ្នកចុច Like (ចូលចិត្ត) ដល់ទៅ២១៧K(២១៧ពាន់នាក់) ដែលឆ្នាំមុន មានតែប្រមាណ៣K(៣ពាន់នាក់)ប៉ុណ្ណោះ»។
តាមរបាយការណ៍ដែលមន្ទីរវប្បធម៌ និងវិចិត្រសិល្បៈ ទទួលបានពីសមាគមគោ ឆ្នាំនេះចំនួននឹមគោដែលបានចុះឈ្មោះប្រកួត មានចំនួន៣៩នឹម គោធំមានចំនួន២៣នឹម និងគោតូចមានចំនួន១៦នឹម។ ទោះជាយ៉ាងណា ចំនួនគោចូលរួមជាក់ស្ដែង អាចនឹងប្រែប្រួល ដោយកត្តាសុខភាពគោ និងកត្តាផ្សេងៗទៀត។ ដោយឡែកកាលពីឆ្នាំមុន គោចូលរួមប្រកួតមានចំនួន២៨នឹម។
គោដែលចូលរួមប្រកួត មានមកពីស្រុកគងពិសី ឧដុង្គ សំរោងទង និងស្រុកថ្ពង ខេត្តកំពង់ស្ពឺ។ ក៏មានដែរគោមកពី ខណ្ឌកំបូក រាជធានីភ្នំពេញ មកពីស្រុកបាធាយ ខេត្តកំពង់ចាម មកពីស្រុកអង្គស្នួល ស្រុកព្រៃពួច និងស្រុកកណ្ដាលស្ទឹង ខេត្តកណ្ដាល។
ការប្រណាំងរទេះសាឡីគោលឿន បានចាប់ផ្ដើមពីម៉ោង៨ព្រឹក នៅលើដីឡូត៍មួយកន្លែង ស្ថិតក្នុងសង្កាត់រការធំ ក្រុងច្បារមន តាមបណ្ដោយផ្លូវជាតិលេខ៤ ត្រង់ចន្លោះបង្គោលគីឡូម៉ែត្រលេខ ៤៣-៤៤ ទល់មុខស្ថានីយប្រេងឥន្ធនៈ PTT។
សូមបញ្ជាក់ថា កាលពីឆ្នាំ២០២១ ការប្រណាំងរទេះសាឡីគោលឿន ទទួលបានអ្នកចូលទស្សនា ក្នុងរង្វង់ពី៥រយទៅ១ពាន់នាក់។ ដោយឡែកឆ្នាំនេះ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ស្ពឺ រំពឹងថានឹងទទួលបានអ្នកទស្សនា ចាប់ពីរាប់ពាន់នាក់ឡើងទៅ។
សូមរំលឹកថា នេះជាឆ្នាំទី៩ហើយ ដែលមន្ទីរវប្បធម៌ និងវិចិត្រសិល្បៈ ខេត្តកំពង់ស្ពឺ សហការណ៍ជាមួយសមាគមគោ ដើម្បីរៀបចំការប្រណាំងរទេះសាឡីគោលឿន។ យ៉ាងណាក៏ដោយ ខេត្តកំពង់ស្ពឺមានប្រពៃណីប្រណាំងរទេះសាឡីគោលឿនតាំងពីបុរាណ។ ហើយក្រោយបែកសង្គ្រាម ខេត្តកំពង់ស្ពឺ ចាប់ផ្ដើមប្រណាំងរទេះសាឡីគោលឿនឡើងវិញ តាំងពីឆ្នាំ១៩៨១មកម្ល៉េះ ប៉ុន្តែធ្វើក្នុងកម្រិតភូមិ ឬសហគមន៍៕