តាមរយៈបន្ទាត់៩ឆ្នូត ចិនបានទាមទារស្ទើរតែ៩០ភាគរយ នៃដែនទឹកនៅក្នុងសមុទ្រចិនខាងត្បូងដែលសម្បូរដោយភោគទ្រព្យធម្មជាតិជាច្រើន ហើយបញ្ហានេះបានបង្កជម្លោះជាមួយរដ្ឋអាស៊ានជាច្រើនដូចជាព្រុយណេ ម៉ាឡេស៊ី ហ្វីលីពីន និងវៀតណាម។ 

 

ថ្លែងពីការិយាល័យនាយករដ្ឋមន្រ្តី លោកអាន់វ៉ា បានលើកឡើងថា បញ្ហាជម្លោះនៅក្នុងសមុទ្រចិនខាងត្បូង ត្រូវបានជជែកក្នុងជំនួបជាមួយលោក ស៊ី​ ជិនភីង ប្រធានាធិបតីចិនក្នុងពេលលោកធ្វើទស្សនកិច្ចនៅប៉េកាំងកាលពីសប្តាហ៍មុន។ 

 

«ក្នុងតំបន់ ដែលមានការទាមទារដូចគ្នា ខ្ញុំបាននិយាយថា ប្រទេសតូចត្រូវការធនធានហ្គាស និងប្រេង យើងត្រូវតែបន្ត។ ប៉ុន្តែបើលក្ខខណ្ឌតម្រូវឱ្យមានការចរចា យើងត្រូវតែចរចា»។ ប្រមុខរដ្ឋាភិបាលម៉ាឡេស៊ី បានបន្ថែមបែបនេះ នៅថ្ងៃទី៣ ខែមេសា។ យ៉ាងណាមិញ មេដឹកនាំម៉ាឡេស៊ី មិនបានបញ្ជាក់ពីតំបន់ជម្លោះ ដែលត្រូវចរចាជាមួយចិនឱ្យបានច្បាស់លាស់ឡើយ។

 

ក្រុមហ៊ុនប្រេងរដ្ឋម៉ាឡេស៊ី Petronas ធ្វើប្រតិបត្តិការនៅក្នុងទីតាំង៤ឬ៥កន្លែង ក្នុងតំបន់សេដ្ឋកិច្ចផ្តាច់មុខ (EEZ)​ របស់ម៉ាឡេស៊ីនៅសមុទ្រចិនខាងត្បូងដែលមានចម្ងាយ ៣៧០គីឡូម៉ែត្រពីឆ្នេរចូលទៅសមុទ្រចិនខាងត្បូង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

 

ដើម្បីដោះស្រាយជម្លោះ ដែលអូសបន្លាយជាច្រើនទស្សវត្សរ៍មកនេះ ចិន និងអាស៊ាន កំពុងចរចាលើក្រុមប្រតិបត្តិសមុទ្រខាងត្បូង  សម្រាប់ជាយន្តការដោះស្រាយជម្លោះក៏ដូចជា កាត់បន្ថយការរីកសាយវិបត្តិ។ 

 

កន្លងមក នាវាចិនធ្លាប់បើកឆ្លងកាត់ ឬបើកក្បែរទីតាំងរុករកប្រេងរបស់ក្រុមហ៊ុន Petronas ដែលបង្កឱ្យមានការតវ៉ាពីសំណាក់ម៉ាឡេស៊ី។ នៅក្នុងឆ្នាំ២០២១ ម៉ាឡេស៊ី បានកោះហៅអគ្គរដ្ឋទូតចិនថែមទៀត ក្រោមហេតុផលឈ្លានពានដែនទឹករបស់ខ្លួន៕