កម្មវិធីTikTok ដែលជាបណ្តាញសង្គមសម្រាប់បង្ហោះវីដេអូខ្លីៗ បានក្លាយជាគោលដៅបង្រ្កាបរបស់ប្រទេសលោកខាងលិច ក្រោមហេតុផលប៉ះពាល់ដល់សន្តិសុខ និងការលួចព័ត៌មានអ្នកប្រើប្រាស់ពីសំណាក់ចិន។ ចុងក្រោយ អូស្រ្តាលី បានសម្រេចហាមឃាត់កម្មវិធី TikTok លើឧបករណ៍អេឡិចត្រូនិចរបស់រដ្ឋាភិបាលដែរ ដូចជាទូរសព្ទ និងកុំព្យូទ័រជាដើម។ 

 

តាមការបញ្ជាក់របស់អគ្គរដ្ឋអាជ្ញាអូស្រ្តាលី លោក Mark Dreyfus ការហាមឃាត់នឹងចូលជាធរមានក្នុងរយៈពេលឆាប់ៗខាងមុខ។ យ៉ាងណាមិញ វាក៏មានករណីលើកលែងចំពោះករណីមួយចំនួន នៅពេលបញ្ហាសន្តិសុខត្រូវបានគិតគូររួចហើយ។ 

 

នាយករដ្ឋមន្រ្តីអូស្រ្តាលី​ អាន់ថូនី អាល់បានីស បានឯកភាពលើការហាមឃាត់កម្មវិធី TikTokក្នុងរដ្ឋាភិបាល បន្ទាប់ពីមានការពិនិត្យចប់សព្វគ្រប់ពីសំណាក់ក្រសួងមហាផ្ទៃ។ ចំណែករដ្ឋ Victoria ក៏រឹតត្បិតកម្មវិធីនេះលើទូរសព្ទរបស់រដ្ឋាភិបាលផង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

ក្រុមហ៊ុន TikTok បានបង្ហាញការខកចិត្តយ៉ាងខ្លាំងចំពោះសេចក្តីសម្រេចរបស់អូស្រ្តាលី។ លោក Lee Hunter អគ្គនាយកក្រុមហ៊ុន TikTok នៅអូស្រ្តាលី បានអះអាងថា ក្រុមហ៊ុន មានការខកចិត្តចំពោះការហាមឃាត់មួយនេះ ដោយសារកន្លងមក ក្រុមហ៊ុនបានស្នើរក្សាការទំនាក់ទំនងជាមួយរដ្ឋាភិបាលជាច្រើនលើក។ 

 

បើតាមលោក Lee Hunter វាគ្មានព័ស្តុតាងណាមួយដែលកម្មវិធីTikTok បង្កហានិភ័យសន្តិសុខដល់ជនជាតិអូស្រ្តាលីនោះឡើយ ហើយអូស្រ្តាលី មិនគួរយកចិត្តទុកដាក់ក្រុមហ៊ុនបណ្តាញសង្គមខុសៗគ្នាឡើយ។ 

 

សូមបញ្ជាក់ថា ក្រុមប្រទេស Five Eyes ដែលចែករំលែកព័ត៌មានចារកិច្ចជាមួយគ្នា បានហាមឃាត់ក្រុមហ៊ុន TikTok ទាំងអស់ ដោយសារបារម្ភពីការប្រមូលព័ត៌មានអ្នកប្រើប្រាស់ឱ្យបក្សកុម្មុយនីស្តចិន។ ក្រុមប្រទេស Five Eyes មានដូចជាអូស្រ្តាលី  កាណាដា នូវែលសេឡង់ អង់គ្លេស និងអាម៉េរិក។ សហភាពអឺរ៉ុប និងបារាំង ក៏បានប្រកាសពីចំណាត់ការស្រដៀងគ្នានេះដែរ៕