បើតាមការប្រកាសរបស់ទីបញ្ជាការដ្ឋានភូមិភាគខាងកើតនៃកងទ័ពរំដោះប្រជាជនចិននៅថ្ងៃទី៨ ខែមេសា សមយុទ្ធយោធាចិននឹងចាប់ផ្ដើមនៅថ្ងៃទី៨ តែម្ដង ក្នុងទម្រង់ជាការល្បាតត្រៀមលក្ខណៈប្រយុទ្ធ និងលំហាត់យោធានៅច្រកសមុទ្រតៃវ៉ាន់ និងនៅប៉ែកខាងជើង ខាងត្បូង និងខាងកើតនៃកើតតៃវ៉ាន់។ បើតាមការប្រកាសនេះ សមយុទ្ធ ធ្វើតាមផែនការដែលកំណត់។
 

ការប្រកាសពីការធ្វើសមយុទ្ធនេះ ធ្វើឡើងក្រោយប្រធានាធិបតី Tsai Ing-wen ត្រឡប់ទៅដល់តៃវ៉ាន់វិញ បន្ទាប់ពីបញ្ចប់ទស្សនកិច្ចនៅប្រទេសសម្ព័ន្ធមិត្តសេសសល់នៅអាម៉េរិកឡាទីន និងការឈប់សំចតនៅអាម៉េរិក។ ជំនួបជាមួយប្រធានសភាតំណាងអាម៉េរិក Kevin McCarthy ធ្វើឱ្យទីក្រុងប៉េកាំងក្ដៅស្លឹកត្រចៀកយ៉ាងខ្លាំងរហូតព្រមានចាត់វិធានការតបវិញ។

 

ឯក្រសួងការពារជាតិតៃវ៉ាន់វិញ នៅថ្ងៃទី៨ ខែមេសា ក៏ប្រកាសថា ខ្លួនចាប់សញ្ញានាវាច្បាំងចិន៣គ្រឿង និងយន្តហោះចម្បាំង១៣គ្រឿងនៅជុំវិញដែនកោះនេះ។ ក្នុងនោះ យន្តហោះចិន៤គ្រឿងហោះកាត់ខ្សែខណ្ឌចែកច្រកសមុទ្រតៃវ៉ាន់ ហើយហោះចូលតំបន់ការពារអាកាសរបស់តៃវ៉ាន់នៅភាគអាគ្នេយ៍ថែមទៀត។

 

តបនឹងការធ្វើសមយុទ្ធរបស់ចិន ក្រសួងការពារជាតិ

តៃវ៉ាន់បញ្ជាក់ពីការត្រៀមខ្លួនដើម្បីឆ្លើយតបដោយសម្រួល តាមហេតុផល និងម៉ត់ចត់ដោយមិនបង្កបញ្ហា ឬឈានដល់មានជម្លោះឡើយ៕