ទិន្នន័យដែលចេញផ្សាយដោយរដ្ឋបាលគយចិនបានបង្ហាញថា ការនាំចេញក្រៅប្រទេស របស់ចិនទៅកាន់កូរ៉េខាងជើង បានកើនឡើង ១៤១,៧ ភាគរយ បើធៀបនឹង ខែមីនាឆ្នាំមុន  បន្ទាប់ពីការកើនឡើង ១៦១,៥ ភាគរយក្នុងខែមករាដល់ខែកុម្ភៈ។ នេះបើយោង តាមរដ្ឋបាលគយចិនទូទៅ។

 

ក្នុងចំណោមនោះ អង្ករជាទំនិញនាំចូលច្រើនជាងគេ ដោយគិតជាតម្លៃសរុប ២២ លានដុល្លារ។ ប្រទេសនេះក៏បាននាំចូលប្រហែល ៨ លានដុល្លារនៃសក់សិប្បនិម្មិត និង ៧ លានដុល្លារ ជាថ្នាំជក់។ ក្រសួងការបរទេសចិនបាននិយាយកាលពីមីនាថា ទំនាក់ទំនងរវាងចិន និងកូរ៉េខាងជើងបានឈានចូលដំណាក់កាលប្រវត្តិសាស្ត្រថ្មីក្នុងប៉ុន្មានឆ្នាំថ្មីៗនេះ ហើយបាន បន្តអភិវឌ្ឍក្រោមការដឹកនាំជាយុទ្ធសាស្ត្ររវាងប្រទេសទាំងពីរ។

 

អគ្គរដ្ឋទូតថ្មីរបស់ចិនប្រចាំនៅកូរ៉េខាងជើង លោក Wang Yajun បានទៅដល់កូរ៉េខាងជើងនៅថ្ងៃទី២៧ ខែមីនា។

គួរបញ្ជាក់ថា ទោះបីជាខណៈពេលដែលកូរ៉េខាងជើងមានការសាកល្បងមីស៊ីលរបស់ខ្លួនជាច្រើនលើកច្រើនសារ  និងទទួលបានការថ្កោលទោស និងការរិះគន់ពីអាមេរិក ព្រមទាំងលោកខាងលិចក្ដីក៏ចិនមិនដែរមានជំហរប្រឆាំងនឹងកូរ៉េខាងជើងនោះដែរ។ ផ្ទុយទៅវិញ ជារឿយៗ ក្រុងប៉េកាំងបានបន្ទោសសមយុទ្ធយោធាអាមេរិក និងសម្ព័ន្ធមិត្តក្នុងការបង្ករឿង និងអសន្តិសុខក្នុងតំបន់៕