ស្ពានចល័តលើគោកដឹកដោយរថយន្ត៤គ្រឿង ដែលជាប្រភេទ TMM នឹងបញ្ជូនទៅកាន់សាធារណរដ្ឋអាហ្រ្វិកកណ្តាល បន្ទាប់ពីការហ្វឹកហ្វឺនរយៈពេល៧ថ្ងៃ ដែលចាប់ពីថ្ងៃទី១៨ ដល់ថ្ងៃទី២៤ ខែមេសា ឆ្នាំ២០២៣។ រថយន្តមួយគ្រឿងផ្ទុកស្ពានចល័តលើគោកប្រវែង១០,៥០ម៉ែត្រ និងទទឹក ៣,៨០ម៉ែត្រ ដែលអាចទ្រទម្ងន់បាន ២០តោន។

 

លោក សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាពបានឱ្យដឹងថា ៖« ស្ពានចល័តដឹកដោយរថយន្ត៤គ្រឿងនេះ អាចធានាបាននូវការប្រើប្រាស់ជាង៤០ម៉ែត្រ។ ស្ពាននេះចល័តបានលឿន សម្រាប់ប្រើប្រាស់តាមព្រែក អូរ និងស្ទឹងតូចៗ ព្រោះវាសមស្របទៅនឹងភូមិសាស្រ្តអាហ្រ្វិកកណ្តាល ដែលអង្គការសហប្រជាជាតិ បានស្នើសុំមករដ្ឋាភិបាលកម្ពុជា»។ 

 

កម្ពុជា នឹងរាយការណ៍ទៅកាន់អង្គការសហប្រជាជាតិ បន្ទាប់ពីកងស្ពានចល័តបញ្ចប់ការហ្វឹកហ្វឺនដោយជោគជ័យ។ កងស្ពានចល័តនេះ នឹងក្លាយជាចំណែកដ៏សំខាន់ ក្នុងជួយសម្រួលស្ថានភាពផ្លូវលំបាកនៅតំបន់បេសកកម្ម MUNISCA៕