អន្តរជាតិ
ប្រមុខ UN និងសមាជិកក្រុមប្រឹក្សាសន្តិសុខរិះគន់ការឈ្លានពានអ៊ុយក្រែន ឯរុស្ស៊ីព្រមានហានិភ័យជម្លោះសកល
× អគ្គលេខាធិការអង្គការសហប្រជាជាតិ (UN) អាន់តូនីញ៉ូ ហ្គូតេរ៉េស និងតំណាងប្រទេសសមាជិកក្រុមប្រឹក្សាសន្តិសុខដែលជាសម្ព័ន្ធមិត្តរបស់អ៊ុយក្រែន បានរិះគន់ចំៗចំពោះការឈ្លានពានរបស់រុស្ស៊ីនៅអ៊ុយក្រែន ដែលជាការវាយប្រហារលើធម្មនុញ្ញរបស់ UN ។ ប៉ុន្តែនាកិច្ចប្រជុំនាថ្ងៃទី២៤ ខែមេសា រដ្ឋមន្ត្រីការបរទេសរុស្ស៊ី ស៊ែហ្គេយ៍ ឡាវរ៉ូវ ព្រមានវិញថាពិភពលោកស្ថិត ក្នុងកម្រិតអាចមានគ្រោះថ្នាក់ជាងអំឡុងសង្គ្រាមត្រជាក់ទៅទៀត។
អំឡុងកិច្ចប្រជុំក្រុមប្រឹក្សាសន្តិសុខស្ដីពីពហុភាគីនិយមប្រកបដោយប្រសិទ្ធភាពតាមរយៈការការពារគោលការណ៍ធម្មនុញ្ញ UN ដែលរៀបចំដោយរុស្ស៊ីដែលជាប្រធានក្រុមប្រឹក្សាសម្រាប់ខែមេសា លោក អាន់តូនីញ៉ូ ហ្គូតេរ៉េស ដែលអង្គុយក្បែរប្រមុខការទូតរុស្ស៊ី បានរិះគន់ការលុកលុយរបស់ក្រុងមូស្គូនៅអ៊ុយក្រែនដែលបានបង្កឱ្យមានការរងទុក្ខវេទនា ការបំផ្លិចបំផ្លាញ និងរុញច្រានឱ្យមានបញ្ហាសេដ្ឋកិច្ចសកលបន្ថែមទៀត។
«ភាពតានតឹងរវាងមហាអំណាចធំៗមានកម្រិតខ្ពស់ជាប្រវត្តិសាស្ត្រ ដូច្នេះហានិភ័យនៃជម្លោះអាចមានតាមរយៈការគណនាខុស»។ លោក ហ្គូតេរ៉េស បានថ្លែងបែបនេះផងដែរចំពោះមុខសមាជិកក្រុមប្រឹក្សាសន្តិសុខ។
ដូចសព្វដងសមាជិកក្រុមប្រឹក្សាសន្តិសុខផ្សេងទៀតមានអាមេរិក បារាំង និងអង់គ្លេស ក៏បានបន្តថ្កោលទោសរុស្ស៊ីចំពោះសង្រ្គាមនៅអ៊ុយក្រែន។ តំណាងអាមេរិកប្រចាំ UN លោកស្រី Linda Thomas-Greenfield និយាយថា រុស្ស៊ីបានលុកលុយប្រទេសជិតខាងរបស់ខ្លួនគឺអ៊ុយក្រែន ហើយបានវាយប្រហារចំបេះដូងធម្មនុញ្ញ UN ហើយសង្គ្រាមឈ្លានពាន និងដណ្ដើមយកទឹកដីមិនអាចទទួលយកបាននោះទេ។
លោកស្រី Thomas-Greenfield ក៏បានចោទរុស្ស៊ីថាបានរំលោភច្បាប់អន្តរជាតិដោយការឃុំខ្លួនជនជាតិអាមេរិកដោយមិនមានមូលហេតុ ហើយបានអំពាវនាវឱ្យដោះលែងអ្នកសារព័ត៌មានកាសែត Wall Street Journal លោក Evan Gershkovich និងអតីតទាហានជើងទឹកឈ្មោះ Paul Whelan ផងដែរ។
ចំណែកតំណាងសហភាពអឺរ៉ុប Olof Skoog ថ្លែងក្នុងកិច្ចប្រជុំដដែលថា ការណ៍ដែលរុស្ស៊ីរៀបចំកិច្ចប្រជុំនេះ មានគោលដៅបង្ហាញថាខ្លួនជាអ្នកការពារធម្មនុញ្ញ UN និងពហុភាគីនិយម។ លោកបន្តថា បើគិតគូរពីពហុភាគីនិយម រុស្ស៊ីត្រូវតែបង្ហាញទង្វើផង។
ចោមរោមដោយការរិះគន់ជុំទិស រដ្ឋមន្ត្រីការបរទេសរុស្ស៊ី ស៊ែហ្គេយ៍ ឡាវរ៉ូវ និយាយថា ពិភពលោកកំពុងឈានដល់កម្រិតគ្រោះថ្នាក់ដែលលើសពីកម្រិតអំឡុងសង្គ្រាមត្រជាក់ទៅទៀត។ បន្ថែមពីនេះ ស្ថានភាពកាន់តែអាក្រក់ទៅតាមរយៈការបាត់បង់ទំនុកចិត្តលើពហុភាគីនិយម។
ប្រាប់អ្នកសារព័ត៌មានមុនកិច្ចប្រជុំ ប្រមុខការទូតរុស្ស៊ីរូបនេះក៏ឆ្លៀតលើកឡើងពីវិបត្តិដែលប្រឈមមុខប្រព័ន្ធអង្គការសហប្រជាជាតិ ដែលលោកចោទចំៗមុខអាម៉េរិក និងបណ្ដាប្រទេសលោកខាងលិចតែម្ដង។ បើតាមលោក ឡាវរ៉ូវ រឿងរ៉ាវទាំងអស់ មិនមែនសុទ្ធតែពាក់ព័ន្ធអ៊ុយក្រែនឡើយ៕
© រក្សាសិទ្ធិដោយ thmeythmey.com