អន្តរជាតិ
ប្រទេស ៥ នៃ EU សម្រេចបានកិច្ចព្រមព្រៀងជាគោលការណ៍ដើម្បីបន្តការដឹកជញ្ជូនគ្រាប់ ធញ្ញជាតិអ៊ុយក្រែន
× គណៈកម្មការអឺរ៉ុបបាននាថ្ងៃទី២៨ ខែមេសាបានលើកឡើងថា បានឈានដល់កិច្ចព្រមព្រៀង ជាគោលការណ៍ដើម្បីអនុញ្ញាតឱ្យការដឹកជញ្ជូនគ្រាប់ធញ្ញជាតិរបស់អ៊ុយក្រែនចាប់ផ្តើមឡើងវិញតាមរយៈប្រទេសចំនួនប្រាំនៃសហភាពអឺរ៉ុប (EU)។
អនុប្រធានគណៈកម្មការអឺរ៉ុបលោក Valdis Dombrovskis បានសរសេរនៅលើបណ្ដាញសង្គម Twitter ថា នាយកប្រតិបត្តិ EU បានឈានដល់ កិច្ចព្រមព្រៀងជាគោលការណ៍ ជាមួយប្រាំ ប្រទេសក្នុងប្លុកដើម្បីដោះស្រាយកង្វល់របស់កសិករទាំងនៅក្នុងប្រទេសជិតខាង EU និង នៅអ៊ុយក្រែន។
លោកបានបន្តថា កិច្ចព្រមព្រៀងនេះរួមមានវិធានការការពារសម្រាប់ផលិតផលបួនគឺស្រូវ សាលី ពោត គ្រាប់រ៉េស និងគ្រាប់ផ្កាឈូករ័ត្ន។ យ៉ាងណាមិញ លោកមិនបានផ្តល់ព័ត៌មាន លម្អិតបន្ថែមចំពោះចំនួន ឬដំណើរការបញ្ជូនឡើយ។
កិច្ចព្រមព្រៀងនេះ បើតាមលោក Dombrovskis ក៏រួមបញ្ចូលទាំងកញ្ចប់ជំនួយដែលមានតម្លៃ ១១០, ២៥ លានដុល្លារសម្រាប់កសិករក្នុងស្រុក។
យ៉ាងណាមិញ ប៊ុលហ្គារី ហុងគ្រី ប៉ូឡូញ រូម៉ានី និងស្លូវ៉ាគី ដែលជាប្រទេសទាំងប្រាំបាន លើកឡើងពីការព្រួយបារម្ភថា គ្រាប់ធញ្ញជាតិពីអ៊ុយក្រែនដែលចង់នាំចេញទៅកាន់ប្រទេស ផ្សេងទៀតកន្លងមកបានពោរពេញក្នុងទីផ្សារក្នុងស្រុករបស់ពួកគេដែលកំពុងតែជំរុញឱ្យតម្លៃ ផលិតផលកសិកម្មក្នុងស្រុកធ្លាក់ចុះរួចមកហើយ។
ប្រទេសទាំងប្រាំបានក្លាយជាផ្លូវឆ្លងកាត់សម្រាប់គ្រាប់ធញ្ញជាតិអ៊ុយក្រែន ខណៈដែលមិន អាចនាំចេញតាមរយៈកំពង់ផែសមុទ្រខ្មៅរបស់ប្រទេសដោយសារតែការឈ្លានពានរបស់រុស្ស៊ី។
ប្រធានគណៈកម្មការអឺរ៉ុបលោកស្រី Ursula von der Leyen បាននិយាយថា កិច្ចព្រមព្រៀង ខាងលើអាចជួយរក្សាសមត្ថភាពនាំចេញរបស់អ៊ុយក្រែន ដូច្នេះវាបន្តផ្គត់ផ្គង់អាហារដល់ពិភព លោក និងព្រមទាំងការពារជីវភាពកសិករ៕
© រក្សាសិទ្ធិដោយ thmeythmey.com