អន្តរជាតិ
អាម៉េរិក រំពឹងទំនាក់ទំនងពាណិជ្ជកម្មអាជីវកម្មនិងយោធាកាន់តែរឹងមាំពេលជួបប្រធានាធីបតីហ្វីលីពីន
× ប្រធានាធិបតីអាមេរិក ចូ បៃឌិន និងសមភាគីហ្វីលីពីន Ferdinand Marcos Jr. ត្រូវរំពឹងថា នឹងឈានដល់កិច្ចព្រមព្រៀងស្តីពីការពង្រឹងអាជីវកម្មកាន់តែច្រើនក៏ដូចជាការពង្រឹងផ្នែកយោធាទៅវិញទៅមកចំពេលមានការព្រួយបារម្ភរួមគ្នាអំពីចិន។ មន្ត្រីរដ្ឋបាលអាមេរិកបានប្រាប់ទីភ្នាក់ងារព័ត៌មាន Reuters បែបនេះនាថ្ងៃទី២៩ ខែមេសា។
លោក Marcos Jr. ធ្វើដំណើរទៅដល់អាមេរិកនៅថ្ងៃទី៣០ ខែមេសាសម្រាប់ដំណើរទស្សនកិច្ចរយៈពេលបួនថ្ងៃ។ បើតាមមន្ត្រីហ្វីលីពីន ទស្សនកិច្ចនេះមានគោលបំណងបញ្ជាក់ឡើងវិញពីទំនាក់ទំនងពិសេសរវាងហ្វីលីពីន និងអាមេរិកដែលជាសម្ព័ន្ធមិត្តយូរអង្វែង។
បើតាមទីភ្នាក់ងារព័ត៌មាន Reuters មន្ត្រីរដ្ឋបាលជាន់ខ្ពស់អាមេរិក និយាយថា អាម៉េរិកមិនអាចមានការមើលស្រាលសារសំខាន់ជាយុទ្ធសាស្ត្ររបស់ខ្លួនជាមួយហ្វីលីពីនបើទោះបីជាទំនាក់ទំនងនេះគឺលើសពីសន្តិសុខក៏ដោយ។
«យើងនឹងដាក់ចេញមុខទំនិញមួយចំនួនក្នុងសប្តាហ៍ក្រោយដែលនឹងបង្ហាញពីការចូលរួមអាជីវកម្ម ប៉ុន្តែក៏មានការពង្រឹងផ្នែកយោធាមួយចំនួនផងដែរ»។ មន្ត្រីរដ្ឋបាលរូបនោះបានបញ្ជាក់បែបនេះរួចបន្តថា ជាផ្នែកមួយនៃការជំរុញទំនាក់ទំនងពាណិជ្ជកម្ម រដ្ឋមន្ត្រីពាណិជ្ជកម្មអាមេរិក Gina Raimondo នឹងដឹកនាំគណៈប្រតិភូធុរកិច្ចទៅកាន់ហ្វីលីពីនផងដែរ។
បើតាមមន្រ្តីដដែល ខណៈពេលដែលលោក Marcos Jr. កំពុងស្វែងរកទំនាក់ទំនងល្អជាមួយចិនផង និងអាមេរិកផង ទីក្រុងម៉ានីលមានការព្រួយបារម្ភកាន់តែខ្លាំងឡើងអំពីការបង្កហេតុដោយទីក្រុងប៉េកាំង និងស្វែងរកទំនាក់ទំនងកាន់តែរឹងមាំជាមួយសម្ព័ន្ធមិត្ត៕
© រក្សាសិទ្ធិដោយ thmeythmey.com