ដោយ៖ ទេពញាណ 
 

ឯកសារស្តីពីការបន្តអនុវត្តកិច្ចសហការប្រតិបត្តិការជាមួយគ្នា ត្រូវបានចុះហត្ថលេខាដោយសម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃកម្ពុជា និងលោក វ៉ាង សៀហុង (Wang Xiaohong) រដ្ឋមន្រ្តីក្រសួងសន្តិសុខចិន។ 
 

ឯកសារនោះ កំណត់ថា ភាគីទាំង២ សម្រេចបង្កើនកិច្ចសហប្រតិបត្តិការទប់ស្កាត់ឲ្យបានដាច់ខាតនូវ «ការប៉ុនប៉ងបង្កើតចលនាបដិវត្តពណ៌» ឬសកម្មភាពដែលបង្កអសន្តិសុខ និងអស្ថិរភាពសង្គម ដើម្បីធានាដល់ការអភិវឌ្ឍ និងប្រយោជន៍នៃប្រជាជាតិទាំង២។ 
 

កិច្ចសហប្រតិបត្តិការផ្សេងទៀតរវាងក្រសួងមហាផ្ទៃកម្ពុជា និងក្រសួងសន្តិសុខចិន គឺ ការបង្ក្រាបឧក្រិដ្ឋកម្មឆ្លងដែនគ្រប់ប្រភេទ ដូចជា ឧក្រិដ្ឋកម្មដែលមានអង្គការចាត់តាំង ល្បែងស៊ីសងអនឡាញ អំពើឆបោកតាមប្រព័ន្ធទូរគមនាគមន៍ ការជួញដូរមនុស្ស ការរត់ពន្ធអាវុធ និង ការជួញដូរគ្រឿងញៀន ជាដើម។ 
 

បន្ថែមពីនេះ ក្រសួងទាំង២នេះ សម្រេចគាំទ្រគ្នាទៅវិញទៅមកលើការកសាងធនធានមនុស្ស និងគាំទ្រគ្នាលើផ្នែកបច្ចេកទេស ដើម្បីបង្កើនសមត្ថភាពក្នុងការស្រាវជ្រាវ ការស៊ើបអង្កេត និងការបង្ក្រាបបទល្មើសឲ្យកាន់តែមានប្រសិទ្ធភាព។ 
 

ខ្លឹមសារអំពីដំណើរទស្សនកិច្ចរបស់សម្តេចឧបនាយករដ្ឋមន្រ្តី ស ខេង ទៅកាន់ប្រទេសចិន ត្រូវបានផ្សព្វផ្សាយតាមរយៈសេចក្តីប្រកាសព័ត៌មាន ដែលចេញដោយក្រសួងមហាផ្ទៃកម្ពុជា។ ដំណើរទស្សនកិច្ចរបស់សម្តេចនៅចិន មានរយៈពេល៣ថ្ងៃ គឺពីថ្ងៃ២៨ ដល់ថ្ងៃ៣០ ខែមេសា ឆ្នាំ២០២៣៕