ក្រោយកាន់តំណែងជាអភិបាលខេត្តសៀមរាបរយៈពេលជិត៥ឆ្នាំ (ឡើងកាន់តំណែងថ្ងៃទី១៣ ធ្នូ ឆ្នាំ២០១៨) លោក ទៀ សីហា ដែលជាកូនសម្ដេច ទៀ បាញ់ រដ្ឋមន្រ្តីក្រសួងការពារជាតិ មានឈ្មោះ ក្នុងបញ្ជីបេក្ខភាពតំណាងរាស្រ្តនីតិកាលទី៧ គណបក្សប្រជាជនកម្ពុជា នាមណ្ឌលខេត្តសៀមរាប។ លោកឈរឈ្មោះនៅលេខរៀងទី៣ បន្ទាប់ពីសម្ដេច ទៀ បាញ់ នៅលេខរៀងទី១ និងលោក សៀង ណាំ ឈរនៅលេខរៀងទី២។ 

 

ចំណុចនេះបានបង្ហាញថា លោក ទៀ សីហា នឹងលាលែងចេញពីតំណែងអភិបាលខេត្ត ប្រសិនបើ​គណបក្សប្រជាជនកម្ពុជាដណ្ដើមកៅអីបាន៣ នៅថ្ងៃបោះឆ្នោតជាតិខាងមុខ។ 

 

ជុំវិញករណីនេះ នាយករដ្ឋបាលខេត្តសៀមរាបលោក លី វណ្ណៈ បានឱ្យដឹងថា នេះជាសេចក្ដីសម្រេច របស់គណៈចាត់តាំងបក្ស ក៏ដូចជាក្រុមការងារចុះជួយខេត្តសៀមរាប។ «តាមពិតទៅវាជារឿងធម្មតា ថ្ងៃក្រោយទៅ សម្ដេចពិជ័យនឹងផ្តល់ឱកាសក្នុងការជាក្រុមការងាររបស់ឯកឧត្តមអភិបាលខេត្ត ប្រសិនថ្ងៃ ក្រោយទៅគាត់ផ្លាស់ការងារទៅក្រុងភ្នំពេញ គាត់នៅតែជាក្រុមការងារចុះមកខេត្តសៀមរាបជួយមើល ជួយតម្រង់ទិស ដូចសម្ដេចពិជ័យបានធ្វើកន្លងមក»។ នេះជាការលើកឡើងរបស់លោក លី វណ្ណៈ ជាមួយសារព័ត៌មានថ្មីៗ។

 

ចំពោះបេក្ខភាពបន្តជាអភិបាលខេត្តជំនួសលោក ទៀ សីហា មិនទាន់មានការបញ្ជាក់នៅឡើយ។ លោក លី វណ្ណៈ អះអាងថា នេះជាការសម្រេចរបស់ថ្នាក់លើ ដែលនឹងប្រជុំសម្រេចនាដំណាក់កាលបន្ទាប់។ 
 

យ៉ាងណា បេក្ខភាពដែលគេមើលឃើញថាអាចនឹងឡើងជាអភិបាលខេត្តជំនួសនោះ គឺលោក ប្រាក់ សោភណ្ឌ ដែលបច្ចុប្បន្នជាអភិបាលរងខេត្ត និងជាប្រធានសហភាពសហព័ន្ធយុវជនកម្ពុជា​ខេត្តសៀមរាប។ លោកជាកូនប្រុសរបស់លោក ប្រាក់ សុខុន រដ្ឋមន្រ្តីក្រសួងការបរទេស។ 

 

លោក ប្រាក់ សោភណ្ឌ ឡើងកាន់តំណែងជាអភិបាលរងនៅខែកុម្ភៈ ឆ្នាំ២០២២ ជំនួសលោក ង៉ាន់ ភិរុណ ដែលប្ដូរការងារ ទៅក្រសួងមហាផ្ទៃ។ នៅថ្ងៃទី២៩ ឧសភា កន្លងទៅថ្មីៗនេះ លោក ប្រាក់ សោភណ្ឌ គណៈអចិន្រ្តៃយ៍នៃគណៈកម្មាធិការកណ្ដាលគណបក្ស ប្រជាជនកម្ពុជា តែងតាំងជាអនុប្រធាន​នៃគណៈកម្មាធិការគណបក្សប្រជាជនកម្ពុជាខេត្តសៀមរាប។ នេះជាសញ្ញាបើកផ្លូវទៅរកតំណែងជា​អភិបាលខេត្តនាថ្ងៃខាងមុខ។ យ៉ាងណា មានតែថ្នាក់លើប៉ុណ្ណោះដែលអាចកំណត់ពីតួនាទីនេះបាន ដែលពលរដ្ឋខេត្តសៀមរាបកំពុងរង់ចាំមើល៕