តាមរយៈការរៀបរាប់របស់បុរសចំណាស់ទាំងពីររូបនេះ ពួកគាត់មិនភ្លេចគ្នាទេ ប៉ុន្តែដោយសារតែភាពចាស់ជរា និងទីលំនៅឆ្ងាយពីគ្នា ដែលជាឧបសគ្គធ្វើឱ្យអ្នកទាំងពីរមិនអាចជួបគ្នាបានជាញឹកញាប់។
 

សម្រាប់អនុស្សាវរីយ៍ ដែលអ្នកទាំងពីរ បានកសាងជាមួយគ្នា មានច្រើន ជាពិសេសការពិសារកាហ្វេ និងលេងអុកជាមួយគ្នា។ លោកតា ថ្លាង ភឹន បានរៀបរាប់ថា៖«(ស្គាល់គ្នាដំបូង) តាមរយៈការលេងអុកហ្នឹង លេងអុកជាមួយគ្នាយូរៗទៅ ក៏រាប់អានគ្នាទៅ។ ដំបូងលេងប្រកួតយូរៗទៅ បបួលគ្នាភ្នាល់ដាក់កាហ្វេអ៊ីចឹងទៅ។ ហើយចាស់ជំនាន់មុន ឱ្យតែចេះលេងអុក គឺមិនសូវចេះទាស់គ្នាទេ។ ហើយយើងរាប់អានគ្នា តាំងពីអាយុជាង២០ ឬ៣០ឆ្នាំមក ក៏នៅតែរាប់អានគ្នាដដែល។ យើងមិនចោលគ្នាទេ ទៅណាមកណាក៏នៅតែនឹកគ្នាដែរ»។
 

 

ជាអ្នកស្នេហាវិស័យកីឡាអុក លោកតា ហាក់ សៀងឡាយ បានធ្វើដំណើរជាង៣០០គីឡូម៉ែត្រ ពីខេត្តក្រចេះ ដើម្បីមកទស្សនាការប្រកួតអុកចត្រង្គ នៅក្នុងព្រឹត្តិការណ៍ស៊ីហ្គេម ។ ពីខេត្តក្រចេះ មកភ្នំពេញម្នាក់ឯង លោកតា សៀងឡាយ ទទួលបានការស្វាគមន៍យ៉ាងខ្លាំងពីសំណាក់អ្នករៀបចំកម្មវិធីកីឡាអុក និងសប្បុរសជននានា ចំពោះក្តីស្រលាញ់របស់លោកតា លើវិស័យកីឡានេះ។ លោកតា សៀងឡាយ បានអះអាងថា លោកតាទទួលបានកន្លែងស្នាក់នៅ និងអាហារហូបគ្រប់គ្រាន់ ពីខាងអ្នករៀបចំ។ លោកតា សៀងឡាយ នឹងទស្សនាការប្រកួតអុកចត្រង្គនេះ រហូតទាល់តែដឹងលទ្ធផលទទួលបានមេដាយជាផ្លូវការ នៅក្នុងការប្រកួតស៊ីហ្គេមនេះ ទើបត្រឡប់ទៅវិញ។