ភ្នំពេញ៖ កញ្ញា អ៊ុង ច័ន្ទសោភា ជាអនុរដ្ឋលេខាធិការទីស្តីការគណៈរដ្ឋមន្រ្តី និងជាអ្នកគ្រប់​គ្រងផ្នែកព័ត៌មាន CNC ដែលមានបទពិសោធន៍មួយរូបផងដែរ។ ក្នុងបទសម្ភាស​ជាមួយសារព័ត៌មានថ្មីៗ កញ្ញា អ៊ុង ច័ន្ទសោភា លើកឡើងថាការងារបន្ថែមនៅទីស្តីការគណៈរដ្ឋមន្រ្តី​ទាមទាឱ្យ​ខ្លួនកាន់តែត្រូវប្រឹងប្រែងបន្ថែមទៀត  ពិសេសការយល់ដឹងពីច្បាប់​របស់ប្រ​ទេស ការរៀបចំសន្និសីទកាសែត ការរៀបចំសេចក្តីប្រកាសផ្សេងៗ និងការតាមដានបច្ចុ​ប្បន្ន​ភាពរបស់បណ្តាក្រសួងនីមួយៗ។

 


 

​កញ្ញា អ៊ុង ច័ន្ទសោភា នាយិកាផ្នែកព័ត៌មាននៃទូរទស្សន៍ CNC ហើយថ្មីៗនេះ កញ្ញា ត្រូវបានតែង​តែងជាអនុរដ្ឋលេខាធិការនៃទីស្តីការគណៈរដ្ឋមន្ត្រី។ សម្រាប់ កញ្ញា អ៊ុង ច័ន្ទសោភា ទទួល​បានសេចក្តីទុកចិត្តពីរាជរដ្ឋាភិបាល គឺជាមោទកភាពផង និងជាការលើកទឹកមួយបន្ថែម​ទៀតឱ្យខ្លួនកាន់តែប្រឹងប្រែងធ្វើការ ដើម្បីចូលរួមចំណែកធ្វើឱ្យសង្គមប្រសើរឡើងផង​​​​។

ជាអនុរដ្ឋលេខាធិការទីស្តីការគណៈរដ្ឋមន្ត្រី ចូលរួមប្រជុំច្រើន និងធ្វើការជាមួយនឹងក្រសួង ស្ថាប័នពាក់ព័ន្ធទាំងអស់។ ទន្ទឹមនឹងនេះ កញ្ញា ក៏ត្រូវតែ​ តាមដាននូវបច្ចុប្បន្នភាពនៃការងាររបស់រាជរដ្ឋាភិបាល ចូលរួមចំណែកក្នុងការរៀបចំសេចក្តីព្រាងច្បាប់។ ជាកិច្ចការងារថ្មី ដែល​ទាមទារឱ្យអនុរដ្ឋលេខាធិការទីស្តីការគណៈរដ្ឋមន្ត្រីរូបនេះ តោងស្រវារៀនសូត្រ ពីរៀម​ច្បង និងសហការីផ្សេងៗទៀត ជាពិសេសគឺការរក្សាភាពចាស់ទុំក្នុងការងារ។ «សម្រាប់​​នាងខ្ញុំ ពេលទៅធ្វើការងារថ្មីមួយ ដើម្បីទទួលបានជោគជ័យគឺត្រូវដាក់ខ្លូនជាអ្នករៀន មានន័យថាទោះបីជាយើងឆ្អិននៅក្នុងវិស័យឯកជន ដូចជាវិស័យសាព័ត៌មាននេះ តែយើង​ថ្មីនៅក្នុងការងាររដ្ឋ។ អ៊ីចឹង មិនថាសហការីចាស់ ឬក្មេងទេដែលនៅទីនោះ ទាំងអ្នកដែលមានតួនាទីទាបជាងនាងខ្ញុំ ក៏ខ្ញុំត្រូវសិក្សាស្វែងយល់ សួរនាំ ដោយទំនាក់ទំនងល្អ ព្រោះ​​មនុស្សម្នាក់ៗ សុទ្ធតែមានចំណុចខ្លាំង និងខ្សោយរៀងៗខ្លួន។ យើងអាចខ្លាំងអ្វីមួយ តែយើងក៏អាចខ្សោយរឿងផ្សេងទៀត»។

 

បើតាម កញ្ញា អ៊ុង ច័ន្ទសោភា ការទទួលបានផ្តល់ទំនុកចិត្ត និងមានតួនាទីនៅក្នុងសង្គម មិនមែនជាងរឿងដែលងាយស្រួលនោះទេ។ វិវឌ្ឍន៍ខ្លួនពីអ្នកសារព័ត៌មាន ទៅជាអ្នកគ្រប់គ្រងផ្នែកព័ត៌មាននៃស្ថានីយ៍ទូរទស្សន៍ និងថ្មីៗនេះទទួលតួនាទី ជាអនុរដ្ឋលេខាធិការទីស្តីការគណៈរដ្ឋមន្រ្តី គឺកើតចេញពីការខិតខំរៀនសូត្រអ្វីដែលថ្មីជានិច្ច។ កញ្ញា អ៊ុង ច័ន្ទសោភា អះអាងដូច្នេះ មុននឹងបន្ថែមថា សម្រាប់ថ្ងៃអនាគត បើទោះជាកញ្ញា នឹងបន្តការងារក្នុងតួនាទីអ្វីក៏ដោយ ក៏ស្មារតីចូលរួមក្នុងវិស័យសារព័ត៌មាន តែងតែនៅនឹងខ្លួនរបស់កញ្ញា ជានិច្ច​។ កញ្ញា អ៊ុង ច័ន្ទសោភា បន្តថា៖ «ឈាមផ្នែកវិស័យព័ត៌មានតែងនៅក្នុងខ្លួននាងខ្ញុំជានិច្ច ព្រោះនាងខ្ញុំស្រឡាញ់ផ្នែកសារព័ត៌មានណាស់។ ហើយបើទោះបីជាថ្ងៃក្រោយ រវល់ខ្លាំងរហូតដល់ផ្តាច់ខ្លួនពីវិស័យនេះ ក៏នាងខ្ញុំចង់មានឱកាសជួបអ្នកព័ត៌មាន ឬវិស័យសារព័ត៌មានដែរ ព្រោះគិតថាក្នុងវិស័យរដ្ឋក៏ត្រូវការជំនាញនេះខ្លាំងដែរ ដោយមិនបានគិតថា យើងពូកែជាងគេទេ តែមានភាពប៉ិនប្រសប់ក្នុងផ្នែកនេះដែរ»៕