ថោង ប្រណី
សៀមរាប៖ សាលាអនុគណក្រុងសៀមរាប សហការជាមួយមន្ទីរធម្មការនិងសាសនាខេត្ត បានរៀបចំពិធីបំបួសកុលបុត្រកុលធីតាចំនួន២០៤រូប នៅសាលាអនុគណក្រុងសៀមរាប វត្តទេពពោធិវង្ស (ហៅវត្តថ្មី) និងតាមបណ្តាវត្តមួយចំនួននៅតំបន់អង្គរ។ ពិធីនេះ ធ្វើឡើងក្នុង គោលបំណងអប់រំបណ្តុំនិស្ស័យតាមបែបពុទ្ធសាសនា ជាការតបស្នងសងគុណចំពោះមាតាបិតា ចំពោះជាតិ សាសនា ព្រះមហាក្សត្រ និងចូលរួមប្រារព្ធបុណ្យវិសាខបូជា ដែលជាបុណ្យជាតិ និងអន្តរជាតិផងដែរ។
ព្រះចៅអធិការវត្តអង្គរខាងជើង ព្រះតេជគុណ តាត មហាទី បានមានសង្ឃដីកាសំណេះសំណាល និងបានរៀបរាប់ពីពិធីបំបួសកុលបុត្រ កុលធីតាយ៉ាងដូចច្នេះថា នេះជាឆ្នាំទី១២ហើយ ដែលមានការរៀបចំពិធីបំបួសនេះ ដោយសាលាអនុគុណក្រុងសៀមរាប ហើយសរុបមានយុវជនយុវតីប្រហែលជាង៧០០០នាក់ បានស្ម័គ្រចិត្តចូលបួសជាសាមណេរ និងសីលវតី។
ក្រៅពីនេះព្រះអង្គបានលើកឡើងថា ព្រះពុទ្ធសាសនាជាសាសនាសាកលមានទ្រឹស្តីសន្តិភាពនិងអហិង្សាជាគោល ជាមាគ៌ាដឹកនាំមនុស្សឲ្យរស់នៅក្នុងសន្តិភាព មិនបៀតបៀនគ្នា មិនព្យាបាទគ្នា ផ្ដល់ស្នាមញញឹមដល់គ្នានិងគ្នាទៅវិញទៅមក។ «សង្គមខ្មែរយើងបានចាត់ទុកវិស័យព្រះពុទ្ធសាសនាជាសាសនាសំខាន់ ជាដៃគូអភិវឌ្ឍន៍មិនអាចខ្វះបាន ហៅថាពុទ្ធចក្រ ដែលថ្នាក់ដឹកនាំគ្រប់ជាន់ថ្នាក់តែងតែយកចិត្តទុកដាក់ក្នុងការកសាងហេដ្ឋារចនាសម្ព័ន្ធនានាក្នុងវិស័យនេះ ដើម្បីបម្រើសេចក្តីត្រូវការរបស់ប្រជាពុទ្ធបរិស័ទយើងបានបំពេញបុណ្យកុសលតាមសេចក្តីជ្រះថ្លា»។ នេះជាសង្ឃដីការបស់ព្រះអង្គ តាត មហាទី នាថ្ងៃ២៩ មេសា នៅបរិវេណវត្តទេពពោធិវង្ស។
បន្ថែមពីនេះ ព្រះគ្រូចៅអធិការវត្តព្រះឥន្ទកោសាអង្គនេះ ក៏បានរំលឹកឡើងវិញពីគុណសម្បត្តិរបស់ពុទ្ធចក្រ ពោលគឺវត្តអារាម ដែលមានព្រះសង្ឃជាតួអង្គសំខាន់នោះ វត្តអារាមបានជួយអភិវឌ្ឍន៍សង្គមកម្ពុជាតាំងពីសម័យមុនរហូតមកទល់បច្ចុប្បន្ននេះ។ មានជាអាទិ៍វិស័យសុខាភិបាល ព្រះសង្ឃជាគ្រូពេទ្យព្យាបាលជំងឺផ្លូវចិត្ត ហើយវត្តអារាមជាមន្ទីរពេទ្យព្យាបាលជំងឺផ្លូវចិត្តដ៏សក្កិសិទ្ធបំផុត។ល។
ព្រះអង្គបានបន្តថា ពិធីកោសក់ បួងសក់ដល់កុលបុត្រកុលធីតានាពេលនេះគឺជាប្រពៃណីទំនៀមទម្លាប់ខ្មែរដ៏យូរលង់ណាស់មកហើយ ដែលតែងតែប្រារព្ធមុនពេលបួស។ សក់គឺជាវត្ថុដែលមនុស្សស្រលាញ់ណាស់ ថែរក្សាការពារសម្អិតសម្អាងរៀងរាល់ថ្ងៃ ប៉ុន្តែកុលបុត្រកុលធីតាបានស្ម័គ្រចិត្តលះបង់សក់ដែលជាទីស្រលាញ់នេះគឺជាការលះបង់មួយដ៏អស្ចារ្យ ជាពិធីកម្មដ៏ធំធេងក្នុងភាពជាយុវវ័យ ដើម្បីសាងផ្នួសបួសសងគុណតបគុណលោកឪពុកអ្នកម្ដាយ និងអ្នកមានគុណទាំងឡាយ ជាពិសេសបានបំពេញនាទីជាកូនប្រុសតាមប្រពៃណីរបស់ខ្មែរ។
ប្រពៃណីខ្មែរកូនប្រុសត្រូវតែតាមផ្នួសបួសជាភិក្ខុឬសាមណេរ ទោះក្នុងរយៈពេលវែងឬក៏រយៈពេលខ្លី រហូតគេបានឲ្យតម្លៃថា បួសសាមណេរសងគុណម្ដាយ ហើយបួសភិក្ខុសងគុណឪពុកទៀតផង។ រីឯកូនស្រីត្រូវអប់រំបន្ទំនិស្ស័យកិរិយាមាយាទនិងឥរិយាបទជាស្ត្រីឲ្យបានល្អ តាមវិធីចូលម្លប់ឬក៏ការបួសជាសីលវតីទៅនេះឯង។
ក្នុងពិធីនោះដែរ លោកស្រី សៀង ចាន់ហេង បានលើកឡើងដូច្នេះថា៖«កាលណាយើងចង់សងគុណដល់ឪពុកម្ដាយ ជីដូនជីតា គឺយើងតែងតែយកការកោសក់សាងផ្នួស ដើម្បីសងគុណអ្នកមានគុណទាំងនោះ។ យ៉ាងណាម៉ិញ កាលដែរមានទុក្ខលំបាក យើងតែងតែស្វែងរកពិធីកោសក់ថ្វាយលាបំណន់ ហើយថ្ងៃនេះ យើងបានរួមគ្នាមកប្រារព្ធពិធីសានផ្នួស ជាការរួមចំណែកព្រះពុទ្ធសាសនា ក្នុងការតបគុណសងគុណដល់អ្នកមានគុណរបស់យើង»។
បនា្ទប់ពីពិធីកោសក់បួងរួច គណៈកម្មការ កុលបុត្រកុលធីតា មាតាបិតាអាណាព្យាបាល ពុទ្ធបរិស័ទជិតឆ្ងាយ បានធ្វើដំណើរប្រទាក់សិនមួយជុំក្នុងបរិវេណបុរីប្រឹមប្រិយ ដោយមានការជួយសម្រួលផ្លូវពីប៉ូលិសចរាចរណ៍និងប្រជាការពារ រួចចូលមកវត្តពោធិវង្សវិញ ហើយចាប់ផ្តើមរៀបចំបួសកុលបុត្រក្នុងព្រះវិហារវត្តពោធិវង្ស និងបំបួសកុលធីតាក្នុងសាលាឆាន់។ បន្ទាប់មក គណៈកម្មការរៀបចំកម្មវិធីបាននិមន្ត និងអញ្ជើញ សាមណេរ-ដូនជីដែលបានបំបួសរួចរាល់ មកក្នុងមហារោង ដើម្បីណែនាំពវិន័យសិក្ខាបទដែលត្រូវបដិបត្តិផ្សេងនៅថ្ងៃបន្តបន្ទាប់ទៀត។
សូមបញ្ជាក់ដែរថា ក្នុងកម្មវិធីនេះក៏មានការអញ្ជើញចូលរួមពីសំណាក់ព្រះសង្ឃ និងពុទ្ធបរិស័ទប្រទេសថៃ ក្នុងគោលបំណងស្វែងយល់បន្ថែមពីការរៀបចំពិធីបំបួសនេះ។ ពិធីបំបួសនេះចាប់ផ្តើមពីថ្ងៃទី២៩ មេសា និងបញ្ចប់នៅថ្ងៃទី៥ ឧសភា៕