សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា សម្ដេច ហ៊ុន សែន នឹងទៅជួបពិភាក្សាអំពីមធ្យោបាយក្នុងការរក្សានូវសន្ទុះនៃការកសាងសហគមន៍អាស៊ាន ជំរុញលើរបៀបវារៈនៃការអភិវឌ្ឍប្រកបដោយចីរភាព ដើម្បីសម្រេចបាននូវសហគមន៍មួយប្រកបដោយបរិយាប័ន្ន ព្រមទាំងពន្លឿនការអភិវឌ្ឍនូវចក្ខុវិស័យសហគមន៍អាស៊ានក្រោយឆ្នាំ២០២៥ សំដៅប្រែក្លាយអាស៊ាន ជាសហគមន៍ដែលតម្រង់ទិសដៅអនាគត និងជាតំបន់ប្រកបដោយសន្តិភាព ស្ថិរភាព សុវត្ថិភាព និងវិបុលភាព។ 
 

បន្ថែមពីនេះ ក៏មានពិភាក្សាលើបញ្ហាក្នុងតំបន់ និងអន្តរជាតិដែលជាក្ដីបារម្ភ និងផលប្រយោជន៍រួម រួមទាំងការអនុវត្តលើការព្រមព្រៀងជាឯកច្ឆន្ទ៥ចំណុចស្ដីពីមីយ៉ាន់ម៉ា និងសេចក្ដីសម្រេចរបស់មេដឹកនាំអាស៊ាន រួមទាំងការអនុវត្តលើទស្សនវិស័យរបស់អាស៊ានស្ដីពីឥណ្ឌូ-ប៉ាស៊ីហ្វិក។
 

ក្រៅពីចូលរួមប្រជុំអាស៊ាន ប្រមុខរដ្ឋាភិបាលកម្ពុជា នឹងមានជំនួបទ្វេភាគីជាមួយសមភាគីអាស៊ាន និងឥស្សរជនអាស៊ានមួយចំនួនផងដែរ៕