រដ្ឋមន្រ្តីការបរទេសសមាជិក EU ទាំង២៧ប្រទេស បានជួបប្រជុំនៅទីក្រុងស្តុកខុល ទឹកដីស៊ុយអែតដើម្បីជជែកពីផែនការរបស់សហភាពអឺរ៉ុបជុំវិញការកែប្រែទំនាក់ទំនងជាមួយចិន។ ប្រាប់អ្នកសារព័ត៌មានក្រោយកិច្ចប្រជុំ ប្រមុខគោលនយោបាយការបរទេសអឺរ៉ុប Josep Borrell លើកឡើងថា រដ្ឋមន្រ្តីនានា ផ្ដល់ការគាំទ្រទូលាយលើផែនការសម្រួលទំនាក់ទំនងជាមួយចិន ដោយចាត់ទុកចិនជាដៃគូប្រជែងផ្នែកនយោបាយ និងជាដៃគូសំខាន់លើបញ្ហាពិភពលោក។

 

«នៅពេលការពឹងផ្អែកធំ វាមានហានិភ័យ។» លោក Borrell និយាយបែបនេះដោយសំដៅទំនាក់ទំនងបច្ចុប្បន្នរវាងអឺរ៉ុប និងចិន។ 

 

បើតាមប្រមុខគោលនយោបាយការបរទេសរូបនេះ អឺរ៉ុបត្រូវរៀនសូត្រកំហុសអតីតកាលរបស់ខ្លួនក្នុងទំនាក់ទំនងជាមួយរុស្ស៊ី នៅពេលដែលពឹងផ្អែកខ្លាំងលើហ្គាសរបស់រុស្ស៊ីនោះ។ ក្រោយចាត់វិធានការលើរុស្ស៊ីចំពោះការបំពានអ៊ុយក្រែន អឺរ៉ុបក៏ប្រឈមមុខវិបត្តិហ្គាសវិញបន្ទាប់ពីទីក្រុងមូស្គូសងសឹកដោយយកហ្គាសជាមួយអាវុធ។

 

សម្រាប់លោក Borrell អឺរ៉ុបសព្វថ្ងៃពឹងផ្អែកលើចិនខ្លាំងជាងរុស្ស៊ីលើបច្ចេកវិទ្យាសំខាន់ៗដូចជាបន្ទះសូឡា និងគ្រឿងបរិក្ខារផ្សេងទៀត។

 

ជាមួយផែនការថ្មី អឺរ៉ុបក៏ត្រូវធ្វើការច្រើនទៀតដើម្បីដាក់ចេញវិធានការជាក់ស្ដែងលើការកាត់បន្ថយការពឹងពាក់ចិន។ លោក Borrell សង្កត់ធ្ងន់ថា អ្វីដែលអឺរ៉ុបធ្វើមិនមែនជាការផ្ដាច់ទំនាក់ទំនងឡើយ តែជាការធ្វើឱ្យមានតុល្យភាពឡើងវិញ៕