ភ្នំពេញ៖ ដើម្បីជំរុញវប្បធម៌អាន ពិសេសក្នុងចំណោមយុវជន វិធីសាសចម្បងគឺការរៀបចំបណ្ណាល័យ។ ការរៀបចំបណ្ណាល័យនោះ ត្រូវផ្ដោតលើគោលការ៥យ៉ាង ទើបអាចទាក់ទាញយុវជន ឱ្យចង់អាន គឺការប្រមូលផ្ដុំឯកសារ ការចងកូដលើសៀវភៅ ឬឯកសារ សៀវភៅ ទៅដល់ទីតាំងវិញ សេវាកម្មប្រើប្រាស់សៀវភៅ និងការបង្កើតសេវាកម្មផ្សេងៗ។
លោក សុខ ឡាក់ សហស្ថាបនិកបណ្ណាល័យបញ្ញវន្ត បានប្រាប់សារព័ត៌មានថ្មីៗថា ដើម្បីទាក់ទាញយុវជនឱ្យចាប់អារម្មណ៍ការអាន ទាល់តែមានការរៀបចំបច្ចេកទេសបណ្ណាល័យ ឱ្យមានភាពងាយស្រួល ទាក់ទាញ និងសម្បូរបែប។ លោកថា មាន៥ចំណុចសំខាន់ៗ ក្នុងការរៀបចំបណ្ណាល័យ ឱ្យមានភាពល្អប្រសើរ។ ទី១. គឺការប្រមូលផ្ដុំឯកសារ។ កិច្ចការងារនេះ ផ្ដោតលើការសិក្សាពីតម្រូវការ ក៏ដូចជាចំណង់ចំណូលចិត្តរបស់យុវជន ពីការអានសៀវភៅ ដើម្បីឱ្យបណ្ណាល័យ សហការជាមួយអ្នកនិពន្ធ ក៏ដូចជាគ្រឹះស្ថានបោះពុម្ពសៀវភៅ ផ្គត់ផ្គង់សៀវភៅ ទៅតាមតម្រូវការរបស់យុវជន។
លោក សុខ ឡាក់ សហស្ថាបនិកបណ្ណាល័យបញ្ញវន្ត
បន្ថែមពីនោះ ការសិក្សាស្រាវជ្រាវ ពីរបាយការណ៍របស់អង្គការ ក៏ដូចជារាជរដ្ឋាភិបាល និងស្ថាប័នផ្សេងៗ ដែលបានផ្សព្វផ្សាយជាសាធារណៈ ពីភាពប្រឈមរបស់យុវជន ពីការជ្រើសរើសជំនាញរបស់យុវជន ពីការអភិវឌ្ឍក្នុងវិស័យផ្សេងៗ ដែលផ្សារភ្ជាប់ជាមួយយុវជន ក៏ជាកត្តាសំខាន់ខ្លាំងណាស់ដែរ។
លោក សុខ ឡាក់ បញ្ជាក់បន្ថែម៖ «យើងបានធ្វើការជាមួយយុវជន តាំងពីឆ្នាំ២០១០ មិនតិចជាង១០០គម្រោងឡើយ លើគម្រោងសង្គម វប្បធម៌ បរិស្ថាន និងគម្រោងផ្សេងៗទៀត។ ដូច្នេះតាមរយៈបទពិសោធទាំងនោះ យើងបានទិន្នន័យពីចំណង់ចំណូលចិត្ត ក៏ដូចជាផែនការជីវិតរបស់គាត់។ ពិសេសបញ្ហាប្រឈមរបស់ពួកគាត់។ ទិន្នន័យទាំងនោះ អាចធ្វើជាមូលដ្ឋានសម្រាប់រៀបចំសៀវភៅ ឱ្យឆ្លើយតប ទៅនឹងតម្រូវការរបស់គាត់បាន។ បន្ថែមពីនោះ យើងក៏ផ្អែកលើឯកសារស្រាវជ្រាវរបស់អង្គរ រដ្ឋាភិបាល ស្ថាប័នផ្សេងៗទៀត និងអ្នកជំនាញមួយចំនួនដែរ ពាក់ព័ន្ធនឹងបញ្ហារបស់យុវជន»។
សម្រាប់គោលការណ៍ទី២ គឺការចងកូដលើសៀវភៅ ឬឯកសារ។ ការចងកូដនោះ ត្រូវរៀបតាមប្រភេទសៀវភៅ តាមភាសា តាមកម្រិត តាមឈ្មោះត្រកូលអ្នកនិពន្ធ និងឆ្នាំនិពន្ធ ដើម្បីឱ្យអ្នកអាន ងាយស្រួលក្នុងការស្វែងរកសៀវភៅដែលខ្លួនត្រូវការ។ បន្ថែមពីនោះពេលនេះ បណ្ណាល័យបញ្ញវន្ត ក៏កំពុងរៀបចំដំឡើងប្រព័ន្ធមួយ ដើម្បីឱ្យអ្នកអាន ស្វែងរកសៀវភៅដែលខ្លួនចង់អាន មុនទៅបណ្ណាល័យ។
ចំណែកគោលការណ៍ទី៣ គឺការរៀបចំដំណើរការសៀវភៅដល់ទីតាំងវិញ។ មានន័យថា ក្រោយពីអានរួច អ្នកអានត្រូវតែយកសៀវភៅ ទៅទុកនៅទីតាំងដើមវិញ ដើម្បីឱ្យអ្នកអានក្រោយ មានភាពងាយស្រួលរក ពិសេសមិនធ្វើឱ្យសៀវភៅរប៉ាត់រប៉ាយ។
ឯគោលការណ៍ទី៤ គឺសេវាកម្មប្រើប្រាស់សៀវភៅ។ ដើម្បីបង្កើតសេវាកម្មនេះបាន បណ្ណាល័យបញ្ញវន្ត ព្យាយាមសិក្សាពីតម្រូវការរបស់អ្នកប្រើប្រាស់ ពិសេសយុវជន ក៏ដូចជាក្រុមគោលដៅមួយចំនួនទៀត ដើម្បីបែងចែកអ្នកប្រើប្រាស់ ជាលក្ខណៈបុគ្គល ក្រុម ឬស្ថាប័ន។ ការធ្វើបែបនេះ ដើម្បីឆ្លើយតបនឹងពេលវេលា និងតម្រូវការអ្នកអាន ដែលស្ថិតក្នុងបរិបទផ្សេងៗគ្នា។
«ខ្ញុំឧទាហរណ៍ថា កូនសិស្សខ្ចី យើងឱ្យរយៈពេលខ្លីទេ អាចថាមួយអាទិត្យ ឬពីរអាទិត្យអីទេក្នុងការប្រើប្រាស់សៀវភៅហ្នឹង ហើយឱ្យគាត់យកមកដូរ ឬឱ្យគាត់បញ្ជាក់ថាសៀវភៅហ្នឹងគាត់ត្រូវការពន្យាពេល។ ចំពោះសាស្ត្រាចារ្យ ឬអ្នកជំនាញ យើងទុកពេលឱ្យគាត់វែង រហូតដល់មួយខែ ឬក៏វែងជាងហ្នឹង អាស្រ័យលើការស្នើសុំរបស់គាត់។ ប្រសិនគាត់មានក្រុម គាត់ស្នើសុំខ្ចី យើងរៀបចំគោលការមួយដាច់ដោយឡែក ដើម្បីឱ្យគាត់ប្រើប្រាស់សៀវភៅ។ ហើយជាលក្ខណៈស្ថាប័ន ក៏យើងរៀបចំគោលការផ្សេងដែរ ដោយយើងឱ្យគាត់រយៈពេលយូរ សឹងតែ៣ខែរហូតដល់មួយឆ្នាំ ទើបយើងយកមកវិញ។ យើងធ្វើបែបនេះបាន ទាល់តែយើងសិក្សាពីពេលវេលារបស់ពួកគាត់»។ នេះជាការបញ្ជាក់របស់លោក សុខ ឡាក់។
ចំពោះគោលការណ៍ទី៥ ដើម្បីជំរុញការអាន គឺការបង្កើតសេវាកម្មផ្សេងៗ ទាក់ទាញអ្នកអាន។ ដូចជាសេវាកម្មប្រឹក្សាការជ្រើសជ្រើសរើសសៀវភៅអាន សេវាកម្មបច្ចេកទេសជ្រើសរើសប្រធានបទ សេវាកម្មផ្សព្វផ្សាយដល់សាធារណជន រួមទាំងសេវាកម្មផ្សេងៗទៀត ។
ជាងនោះទៅទៀត សហស្ថាបនិកបណ្ណាល័យបញ្ញវន្តរូបនេះ សង្កត់ធ្ងន់ថា បណ្ណារក្សដែលធ្វើការក្នុងបណ្ណាល័យ មានតួនាទីយ៉ាងសំខាន់ ដូច្នេះពួកគេគួរតែមានចំណេះដឹងទូលំទូលាយ ពាក់ព័ន្ធនឹងសៀវភៅ ដើម្បីណែនាំសៀវភៅទៅកាន់អ្នកអានឬសាធារណជន។ ពិសេសបណ្ណារក្សដែលធ្វើការ ជាមួយអ្នកអានដែលមានចំនួនច្រើន បណ្ណារក្សត្រូវមានបច្ចេកទេស ភ្ជាប់ទំនាក់ទំនង អ្នកប្រើប្រាស់សៀវភៅ ដូចជាស្ថាប័ន អាណាព្យាបាល និងគ្រូបង្រៀនជាដើម។
លោក សុខ ឡាក់ បន្ថែមថា ដើម្បីបណ្ដុះការអានឱ្យមានប្រសិទ្ធភាព គេត្រូវការពេលវេលា រួមទាំងត្រូវការបណ្ណារក្សដែលចេះធ្វើផែនការ ពិសេសផែនការអាន និងការរៀបចំយុទ្ធសាស្ត្រ បំផុសការអានជាមួយសាធារណជន។
លោក សុខ ឡាក់ ពន្យល់បន្ថែម៖«ដើម្បីឱ្យសេវាកម្មប្រើប្រាស់សៀវភៅ បានទូលំទូលាយ គឺការបង្កើតបណ្ណាល័យនៅតាមកម្មវិធីផ្សេងៗ និងសួនអំណានផ្សេងៗ ឱ្យសាធារណជនមានទម្លាប់ប៉ះសៀវភៅ និងឱ្យគាត់មើលឃើញថា ការអានសៀវភៅ គឺជារូបភាពទូទៅ មិនមែនជារូបភាពសម្រាប់អ្នកចេះទេ។ ការអានសៀវភៅដូចជាការហូបបាយអ៊ីចឹង គឺយើងត្រូវបំពេញវាជាប្រចាំ ដើម្បីបំពេញតម្រូវការខួរក្បាល ទាំងអស់នេះគឺជាចំណីខួរក្បាល ដើម្បីគាត់យកទៅដោះស្រាយបញ្ហា ក៏ដូចជាប្រកបរបរ និងការធ្វើការងារផ្សេងៗ ដើម្បីអភិវឌ្ឍន៍ខ្លួន»៕