កីឡាករហែលទឹកពាក់ជើងទា (Finswimming) សម្រេចបានជោគជ័យដ៏ធំធេងក្នុងព្រឹត្តិការណ៍កីឡាស៊ីហ្គេមលើកទី៣២នៅពហុកីឡដ្ឋានជាតិមរតកតេជោពីថ្ងៃទី១២ ដល់ថ្ងៃទី១៤ ខែឧសភា។ ក្រោយទទូលបានមេដាយសំរឹទ្ធ១លើកដំបូងបំផុតនៅវៀតណាម ម្ចាស់ផ្ទះកម្ពុជារកបានមេដាយមាស២ ប្រាក់១ និងសំរឹទ្ធ៤។ កីឡាការិនី កាំង មុយនីន ក្លាយជាម្ចាស់កំណត់ត្រាប្រវត្តិសាស្ត្រនៃការហែលទឹកពាក់ជើងទាកម្ពុជា ដែលឈ្នះមេដាយមាស២តែម្នាក់ឯងក្នុងស៊ីហ្គេមលើទឹកដីរបស់ខ្លួន។
លើវិញ្ញាសាហែលចម្ងាយ២០០ម៉ែត្រ កីឡាការិនី កាំង មុយនីន បានទៅដល់ទីមុនគេជាមួយថិរវេលា ០១:៥១.៦៩០ ដើម្បីទទួលបានមេដាយមាស។ កីឡាការិនីហ្វីលីពីន Alexi Cabayaran បានមេដាយប្រាក់ដោយប្រើថិរវេលា ០១:៥៦.២៩០។ កាន់តែរំភើបនោះ កីឡាការិនីកម្ពុជាម្នាក់ទៀត គឺ ឃឺន ប៊ុនពេជ្យមរកត បានមេដាយសំរឹទ្ធជាមួយនឹងថិរវេលា ០១:៥៧.០៤០ ដោយនាំមុខកីឡាការិនី៥នាក់ទៀតពីសិង្ហបុរី ហ្វីលីពីន និងម៉ាឡេស៊ី។
មេដាយមាសទីពីររបស់ កាំង មុយនីន បានលើវិញ្ញាសាហែលចម្ងាយ៤០០ម៉ែត្រ។ នៅវគ្គជម្រុះ មុយនីន និង ប៊ុនពេជ្យមរកត បញ្ចប់ក្នុងចំណាត់ថ្នាក់លេខ១ និងលេខ២ ក្នុង Heat 2 របស់ខ្លួន។ ឈានចូលដល់ជុំផ្តាច់ព្រ័ត្រ មុយនីន បន្តទៅដល់ទីមុនគេក្នុងថិរវេលា ០៣:៥៩.០១០ ។ កីឡាការិនីឥណ្ឌូណេស៊ី Raqiel Azzahra បានមេដាយប្រាក់ជាមួយថិរវេលា ០៤:០៥.៩៧០។ ប៊ុនពេជ្យមរកត ក៏ទទួលបានមេដាយសំរឹទ្ធទីពីររបស់ខ្លួនផងដែរ ក្នុងឋិរវេលា ០៤:០៩.៦២០ ដោយនាំមុខគូប្រជែង៥រូបទៀតពីសិង្ហបុរី ហ្វីលីពីន និងម៉ាឡេស៊ី។
មេដាយប្រាក់១ ដែលកម្ពុជាទទួលបាននោះ គឺសម្រេចបានដោយកីឡាករ លឹម សុខវឌ្ឍន៍នន្ទ លើវិញ្ញាសាហែលចម្ងាយ២០០ម៉ែត្រ (Men’s 200m Surface) ក្នុងថិរវេលា ០១:៣២.៧៦០ ខណៈ ទួន ទិត្យសត្យា ដែលជាកីឡាករកម្ពុជាមួយរូបទៀត ឈ្នះមេដាយសំរឹទ្ធដោយប្រើថិរវេលា ០១:៣២.៧៧០។ មេដាយមាសបានទៅលើកីឡាករថៃ Wuthiphat Sa-Nguanwong ក្នុងថិរវេលា ០១:២៩.៨០០ រីឯកីឡាករហ្វីលីពីន២រូប និងសិង្ហបុរី២រូបទៀត ស្ថិតនៅក្រៅតំបន់មេដាយ។
ក្រៅពីមេដាយសំរឹទ្ធ២របស់ ពេជ្យមរកត និង១របស់ ទិត្យសត្យា មេដាយសំរឹទ្ធមួយទៀតដែលកម្ពុជាទទួលបាន គឺនៅលើវិញ្ញាសាហែលហែលបណ្តាក់ ៤គុណនឹង២០០ម៉ែត្រ (Men’s Relay 4x200m Surface) ដោយមានកីឡាករ លឹម សុខវឌ្ឍន៍នន្ទ, ទួន ទិត្យសត្យា, លឹម កែវឧត្តម និងឆោម ច័ន្ទថន ក្នុងថិរវេលា ០៦:២៧.១៨០។ ក្រុមវៀតណាមបានមេដាយមាស (០៥:៥០.០៣០) រីឯក្រុមឥណ្ឌូណេស៊ី បានមេដាយប្រាក់ (០៥:៥២.១៨០)។ ក្រុមហ្វីលីពីន និងសិង្ហបុរី នៅក្រោយគេ។
បើគិតលើចំនួនមេដាយដែលអត្តពលិកទទួលបាននោះ កាំង មុយនីន បានមេដាយមាស២, លឹម សុខវឌ្ឍន៍នន្ទ បានប្រាក់១ សំរឹទ្ធ១, ឃឺន ប៊ុនពេជ្យមរកត បានសំរឹទ្ធ២, ទួន ទិត្យសត្យា បានសំរឹទ្ធ២ ខណៈលឹម កែវឧត្តម និងឆោម ច័ន្ទថន បានសំរឹទ្ធម្នាក់១។
សម្រាប់វិញ្ញាសាហែលទឹកពាក់ជើងទានេះ កម្ពុជាស្ថិតក្នុងចំណាត់ថ្នាក់លេខ៤។ វៀតណាមឈរលើកំពូលតារាងមេដាយ ជាមួយមាស១៤ ប្រាក់១១ សំរឹទ្ធ៤, ឥណ្ឌូណេស៊ីលេខ២ ដោយឈ្នះមាស៦ ប្រាក់១០ សំរឹទ្ធ៥។ ថៃឈ្នះមេដាយមាស២ ប្រាក់១ សំរឹទ្ធ១០។
ហ្វីលីពីនស្ថិតនៅលេខ៥ បន្ទាប់ពីកម្ពុជា ដោយបានឈ្នះមេដាយប្រាក់១,ម៉ាឡេស៊ី ទទួលបានសំរឹទ្ធ១ រីឯសិង្ហបុរី មិនទទួលបានមេដាយណាមួយឡើយ។
ដោយឡែកកីឡាហែលទឹក កីឡាលោតទឹក និងកីឡាបាល់ទឹក មិនទទួលបានមេដាយឡើយក្នុងព្រឹត្តិការណ៍កីឡាស៊ីហ្គេមលើកទី៣២នេះ បើទោះបីជាមានវិញ្ញាសាមួយចំនួនឈានទៅដល់ជុំផ្តាច់ព្រ័ត្រក៏ដោយ៕
រាយការណ៍បន្ថែមដោយ អ៊ូ សុខមាន