រដ្ឋមន្រ្តីការបរទេសអ៊ុយក្រែន លោក Dmytro Kuleba នៅថ្ងៃទី១៧ ខែឧសភា បានជួបជាមួយលោក Li Hui ប្រេសិតពិសេសរបស់ចិន និងជាអតីតអគ្គរដ្ឋទូតប្រចាំនៅរុស្ស៊ី ដើម្បីជជែកពីបញ្ហាបញ្ចប់សង្រ្គាមនៅអ៊ុយក្រែន ក៏ដូចជាការបញ្ឈប់សកម្មភាពឈ្លានពានរបស់រុស្ស៊ី។ 

 

«លោក Kuleba បានបញ្ជាក់ថា អ៊ុយក្រែនមិនទទួលយកសំណើណាមួយឡើយ ដែលពាក់ព័ន្ធនឹងការបាត់បង់ដែនដី ឬធ្វើឱ្យជម្លោះមិនត្រូវបានដោះស្រាយឡើយ»។ ក្រសួងការបរទេសអ៊ុយក្រែន បានបញ្ជាក់បែបនេះ នៅក្នុងសេចក្តីថ្លែងការណ៍មួយ ដោយបន្តថា ការស្តារសន្តិភាពឡើងវិញ គឺអាស្រ័យលើការគោរពអធិបតេយ្យ និងបូរណភាពដែនដីរបស់អ៊ុយក្រែន។ នេះបើតាមការចុះផ្សាយរបស់សារព័ត៌មាន Al Jazeera។ 

 

ក្នុងដំណើរទស្សនកិច្ចនៅអ៊ុយក្រែនជាលើកដំបូងចាប់ពីថ្ងៃទី១៦ ដល់ថ្ងៃទី១៧ ខែឧសភានេះ លោក Li Hui ក៏បានជួបជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គីផងដែរ។ យ៉ាងណាមិញ ភាគីចិន មិនបានបញ្ជាក់ពីសម្តីរបស់លោក Li ឡើយ។ 

 

តាមក្រសួងការបរទេសចិន ប្រេសិតរបស់ខ្លួនរំពឹងធ្វើទស្សនកិច្ចនៅរុស្ស៊ូ ប៉ូឡូញ អាល្លឺម៉ង់ និងបារាំង ដើម្បីជជែកពីមធ្យោបាយស្វែងរកដំណោះស្រាយសង្រ្គាមនៅអ៊ុយក្រែន។ គោលបំណងនៃទស្សនកិច្ចនេះ គឺដើម្បីជួបភាគីជម្លោះទាំងអស់។ 

 

កន្លងមក រុស្ស៊ី បានអះអាងថា ខ្លួនត្រៀមខ្លួនជាស្រេចក្នុងការចរចាជាមួយអ៊ុយក្រែន។ យ៉ាងណាមិញ ក្រុងកៀវ បានតបថា កិច្ចចរចានឹងកើតមាន លុះត្រាតែក្រុងមូស្គូ ដកទ័ពចេញពីដែនដីរបស់ខ្លួនទាំងអស់។ 

 

សូមបញ្ជាក់ថា មកទល់ពេលនេះ សង្រ្គាមនៅតែបន្តកើតមាន ខណៈជំនួយអាវុធជាច្រើនពាន់លានដុល្លារពីសំណាក់លោកខាងលិច ត្រូវបានបញ្ជូនមកអ៊ុយក្រែនជាបន្តបន្ទាប់ ដើម្បីទប់នឹងការវាយប្រហាររបស់រុស្ស៊ី៕