សម្រាប់ប្រភេទកីឡាអុកចត្រង្គ ដែលបង្ហាញវត្តមានជាលើកដំបូងក្នុងព្រឹត្តិការណ៍កីឡាស៊ីហ្គេម កីឡាករ-កីឡាការិនីពី៧ប្រទេស រួមមានម្ចាស់ផ្ទះកម្ពុជា ឡាវ ម៉ាឡេស៊ី មីយ៉ាន់ម៉ា ហ្វីលីពីន ថៃ និងវៀតណាម បានប្រកួតប្រជែងលើ៧វិញ្ញាសា។
លើវិញ្ញាសាអុកចត្រង្គទោលផ្នែកបុរស៥នាទី (Singles 5-Minute) កម្ពុជាបានមេដាយ២ គឺមេដាយមាសរកបានដោយកីឡាករ សុខ លឹមហេង រីឯមេដាយសំរឹទ្ធ បានទៅលើកីឡាករ នូ ចាន់ផានិត។
ក្នុងការប្រកួតជម្រុះពូល A សុខ លឹមហេង បានយកឈ្នះកីឡាករហ្វីលីពីន Edmundo Oseo Gatos, កីឡាករីមីយ៉ាន់ម៉ា Naing Myo Lin, កីឡាករវៀតណាម Nguyen Quang Trung, កីឡាករឡាវ Heuangboutsy Inthanouphet ហើយស្មើជាមួយកីឡាករថៃ Tupfah Khumnorkaew។
ជ័យជម្នះ៤ និងស្មើ១ នាំឱ្យ សុខលីមហេង កីឡាករ សុខ លឹមហេង ដែលជាម្ចាស់ជើងឯកអង្គសង្គ្រាន្តឆ្នាំ២០២៣ ឈរលើកំពូលតារាងពូល A ដោយត្រូវប៉ះកីឡាករវៀតណាម Nam Thang Hoang នៅវគ្គពាក់កណ្តាលផ្តាច់ព្រ័ត្រ។
រីឯនៅក្នុងពូល B កីឡាករកម្ពុជា នូ ចាន់ផានិត ក៏ឈរលើកំពូលតារាងផងដែរក្រោយឈ្នះ៤ ស្មើ១ ដូចគ្នា ពោលគឺឈ្នះកីឡាករហ្វីលីពីន Young Abuno Angelo, កីឡាករមីយ៉ាន់ម៉ា Aung Naing, កីឡាករវៀតណាម Nam Thang Hoang, កីឡាករឡាវ Khongsavanh Senglek និងស្មើកីឡាករថៃ Meechai Kaewfainok។
កីឡាករ នូ ចាន់ផានិត បានឡើងទៅប្រកួតវគ្គពាក់កណ្តាលផ្តាច់ព្រ័ត្រ ដោយប៉ះជាមួយលេខ២ពូល A គឺកីឡាករវៀតណាម Nguyen Quang Trung។ កីឡាករ ចាន់ផានិត បានរងបរាជ័យ ហើយទទួលបានមេដាយសំរឹទ្ធស្ទួនជាមួយកីឡាករវៀតណាម Nam Thang Hoang។
ក្រោយយកឈ្នះ Nam Thang Hoang កីឡាករ សុខ លីមហេង បានបន្តយកឈ្នះ Nguyen Quang Trung ម្តងទៀត ហើយទទួលបានមេដាយមាសដំបូងសម្រាប់កម្ពុជាពីកីឡាអុកចត្រង្គ។
បន្ថែមពីលើនេះ កម្ពុជាបានទទួលមេដាយប្រាក់ចំនួន៤។ កីឡាករ សំ កក្កដា បានលើវិញ្ញាសាបុរសទោល៦០នាទី (Singles 60-Minute) ក្រោយចាញ់កីឡាករថៃ Boonsueb Saeheng នៅវគ្គផ្តាច់ព្រ័ត្រ។ នាជំនួបវគ្គជម្រុះតាមពូល កក្កដា បានយកឈ្នះកីឡាករហ្វីលីពីន Edmundo Oseo Gatos, កីឡាករឡាវ Chi Yang, កីឡាករថៃ Tinnakrit Arunnuntapanich, កីឡាករមីយ៉ាន់ម៉ា Aung Naing តែចាញ់កីឡាករវៀតណាម Vo Thanh Ninh។
ឈានដល់វគ្គពាក់កណ្តាលផ្តាច់ព្រ័ត្រ សំ កក្កដា បានយកឈ្នះកីឡាករវៀតណាម Khoa Bao ប៉ុន្តែបានខកឱកាសមេដាយមាស ក្រោយចាញ់កីឡាករថៃ Boonsueb Saeheng។ កីឡាករវៀតណាមទាំងពីររូប គឺ Vo Thanh Ninh និង Khoa Bao ទទួលបានមេដាយសំរឹទ្ធស្ទួន។
សម្រាប់វិញ្ញាសាគូបុរស៦០នាទី (Doubles 60-minute) កីឡាករ ប៊ូ ប៊ុណ្ណម៉ាលីកា និងយ៉ាន សុខលាង បានមេដាយប្រាក់។ នៅការប្រកួតវិលជុំ ក្រុមកម្ពុជា បានឈរចំណាត់ថ្នាក់លេខ២ ដោយឈ្នះ៥ និងចាញ់១ ពោលគឺឈ្នះក្រុមវៀតណាម, មីយ៉ាន់ម៉ា, ហ្វីលីពីន, ឡាវ, ម៉ាឡេស៊ី តែចាញ់ក្រុមថៃ។
សរុបលទ្ធផលគ្រប់ការប្រកួត ក្រុមកីឡាករថៃ Warot Kananub និង Worathep Timsri បានមេដាយមាស, កីឡាករកម្ពុជា ប៊ូ ប៊ុណ្ណម៉ាលីកា និងយ៉ា សុខលាង។ មេដាយសំរឹទ្ធស្ទួន បានលើក្រុមហ្វីលីពីន Jan Emmanuel Encarnacion Garcia និង Paulo Sales Bersamina រួមជាមួយក្រុមវៀតណាម Quang Trung Nguyen និង Trong Binh Phan។
មេដាយប្រាក់១ទៀត បានលើវិញ្ញាសា៣ទល់៣រយៈពេល៦០នាទី (Triples 60-Minute) ដោយមានកីឡាករ ជា ស៊ីដេត, ឈាវ បូរ៉ា និងសុខ លឹមហេង។ នៅវគ្គជម្រុះ កម្ពុជា បានយកឈ្នះក្រុមមីយ៉ាន់ម៉ា, វៀតណាម ហ្វីលីពីន និងម៉ាឡេស៊ី ប៉ុន្តែចាញ់ក្រុមថៃ។
សរុបពិន្ទុរួម ក្រុមថៃ Warot Kananub, Wisuwat Teerapabpaisit និង Worathep Timsri បានមេដាយមាស, ក្រុមកម្ពុជា ជា ស៊ីដេត, ឈាវ បូរ៉ា និងសុខ លឹមហេង បានមេដាយប្រាក់ រីឯមេដាយសំរឹទ្ធស្ទួនបានលើក្រុមវៀតណាម Dương Thế Anh, Hoàng Nam Thắng និង Trần Quốc Dũng និងក្រុមមីយ៉ាន់ម៉ា Nay Oo Kyaw Tun, Nyein Chan, Win Zaw Htun។
ក្នុងវិញ្ញាសា៤ទល់៤ រយៈពេល៦០នាទី (Quadruples 60-minute) ក្រុមកីឡាករកម្ពុជា ឆយ វីរ៉ា, ជា ស៊ីដេត, ប៊ិន គាសេង និង ម៉េង សេរីសម្បត្តិ ក៏ទទួលបានមេដាយប្រាក់ផងដែរ ក្រោយបានយកឈ្នះក្រុមហ្វីលីពីន, មីយ៉ាន់ម៉ា, ស្មើក្រុមវៀតណាម និងចាញ់ក្រុមថៃ។
ក្រុមថៃ Wisuwat Teerapabpaisit, Ekkalak Ngammeesri, Tinnakrit Arunnuntapanich និង Boonsueb Saeheng បានមេដាយមាស។ ក្រុមកម្ពុជា ឆយ វីរ៉ា, ជា ស៊ីដេត, ប៊ិន គាសេង និង ម៉េង សេរីសម្បត្តិ បានមេដាយប្រាក់ រីឯក្រុមហ្វីលីពីន Rogelio Madrigal Antonio, Darwin Rosales Laylo, Paulo Sales Bersamina និង Jan Emanuel Encarnacion Garcia រួមទាំងក្រុមវៀតណាម Bảo Khoa, Dương Thế Anh, Trần Quốc Dũng និង Võ Thành Ninh បានសំរឹទ្ធស្ទួន។
ចំណែកវិញ្ញាសានារីទោល៦០នាទី និងគូនារី៦០នាទីវិញ កម្ពុជាមិនទទួលបានលទ្ធផលល្អឡើយ ដោយវៀតណាមទទួលបានមេដាយមាសទាំងពីរវិញ្ញាស ហើយហ្វីលីពីន ក៏ទទួលមេដាយប្រាក់ទាំងពីរវិញ្ញាសាដូចគ្នាផងដែរ។
សម្រាប់តារាងមេដាយលើប្រភេទកីឡាអុកចត្រង្គនេះ ថៃឈរលេខ១ ដោយឈ្នះមេដាយមាស៤ និងសំរឹទ្ធ១, វៀតណាមបានមេដាយមាស២ ប្រាក់១ សំរឹទ្ធ៧, កម្ពុជា បានមេដាយមាស១ ប្រាក់៤ សំរឹទ្ធ១, ហ្វីលីពីន បានមេដាយប្រាក់២ សំរឹទ្ធ៣ រីឯមីយ៉ាន់ម៉ា បានមេដាយសំរឹទ្ធ២។
អុកចិន៖ សំរឹទ្ធ៣
ងាកទៅកីឡាអុកចិន (Xiangqi) ឯណោះវិញ កម្ពុជាទទួលបានមេដាយសំរឹទ្ធចំនួន៣ក្នុងការប្រកួតប្រជែងសរុប៤វិញ្ញាសា។ វិញ្ញាសា Standard Single បានទៅលើកីឡាករ Keung On Chan ដោយប្រកួតឈ្នះ២ ស្មើ២ និងចាញ់មួយ។
កីឡាករកម្ពុជារូបនេះ បានមេដាយសំរឹទ្ធស្ទួន ជាមួយកីឡាករវៀតណាម Nguyen Thanh Bao ខណៈកីឡាករវៀតណាមមួយរូបទៀត គឺ Lai Ly Huynh បានមេដាយមាស រីឯកីឡាករសិង្ហបុរី Alvin Woo Tsung Han បានមេដាយប្រាក់។
សម្រាប់វិញ្ញាសា Men’s Rapid Team វិញ ក្រុមកីឡាករកម្ពុជា ហេង ចំណាន និងជូ យូគឿន បានសំរឹទ្ធស្ទួនជាមួយក្រុមសិង្ហបុរី Junyang Ng និង Low Yi Hao។ មេដាយមាសបានលើក្រុមវៀតណាម Dang Cuu Tung Lan និង Nguyen Quang Nhat, មេដាយប្រាក់បានលើក្រុមម៉ាឡេស៊ី Tan Yu Huat និង Yeoh Thean Jern។ សម្រាប់វិញ្ញាសានេះ ក្រុមកម្ពុជាបានឈ្នះ២ និងស្មើ៣ នាការប្រកួតជម្រុះ។
មេដាយសំរឹទ្ធចុងក្រោយ បានលើវិញ្ញាសា Men’s Blitz Team ដែលមានកីឡាករ ហេង ចំណាន និង Keung On Chan។ កម្ពុជាបានស្ទួនជាមួយក្រុមម៉ាឡេស៊ី Sim Yip How និង Yeah Thean Jern។ ក្រុមសិង្ហបុរី Alvin Woo Tsung Han និង Low Yi Hao បានមេដាយមាស, ក្រុមវៀតណាម Chu Tuan Hai និង Ha Van Tien បានមេដាយប្រាក់។ នាវគ្គជម្រុះ ក្រុមកម្ពុជាបានប្រកួតឈ្នះ២ និងចាញ់៣។
សម្រាប់ប្រភេទកីឡាអុកចិននេះ វៀតណាមឈរលេខ១ ដោយឈ្នះមេដាយមាស២ ប្រាក់២ សំរឹទ្ធ១, សិង្ហបុរី លេខ២ ជាមួយមេដាយមាស២ ប្រាក់១ សំរឹទ្ធ២, ម៉ាឡេស៊ី បានមេដាយប្រាក់១ សំរឹទ្ធ២ និងកម្ពុជាបានមេដាយសំរឹទ្ធ៣៕
រាយការណ៍បន្ថែមដោយ គឹម មករា, ជា យូគៀង, ឌួក ដែន