រដ្ឋាភិបាលឥណ្ឌូណេស៊ីបានត្រៀមថវិកាសរុបចំនួន ១៣០,៥ ពាន់លាន IDR (៨៧៤០០០ដុល្លារ) សម្រាប់ជាប្រាក់រង្វាន់លើកទឹកចិត្តដល់អត្តពលិកដែលឈ្នះមេដាយក្នុងព្រឹត្តិការណ៍កីឡាអាស៊ីអាគ្នេយ៍នៅកម្ពុជា។ យ៉ាងណាក៏ដោយ ថវិការត្រៀមនេះ ទំនងជាមិនគ្រប់នោះឡើយ ដ្បិតអត្តពលិកឥណ្ឌូណេស៊ីឈ្នះមេដាយលើសផែនការ។ នេះបើតាមការផ្សាយរបស់កាសែតឥណ្ឌូណេស៊ី Ruetir នៅថ្ងៃទី១៧ ខែឧសភា។
 

អត្តពលិកឥណ្ឌូណេស៊ី បានជួយក្រុមប្រទេសពួកគេបញ្ចប់ក្នុងចំណាត់ថ្នាក់ទី៣ បន្ទាប់ពីវៀតណាម និងថៃ ដោយទទួលបានមេដាយសរុប២៧៦ ក្នុងនោះមាស៨៧ ប្រាក់៨០ និងសំរឹទ្ធ១០៩។
 

តាមរយៈការផ្សាយរបស់កាសែតឥណ្ឌូណេស៊ីដដែល រដ្ឋាភិបាលឥណ្ឌូណេស៊ី បានប្រកាសផ្តល់រង្វាន់ដល់អត្តពលិកដែលឈ្នះមេដាយមាសក្នុងការប្រកួតឯកត្តជន ចំនួន៣៣០០០ដុល្លារ មេដាយប្រាក់២០០០០ដុល្លារ និងសំរឹទ្ធ១០០០០ដុល្លារ។ ដោយឡែកមេដាយមាសសម្រាប់ការប្រកួតជាគូ ទទួលបាន២៧០០០ដុល្លារ ប្រាក់១៦០០០ដុល្លារ និងសំរឹទ្ធ៨០០០ដុល្លារ។ សម្រាប់មេដាយមាសជាក្រុមទទួលបានក្នុងម្នាក់២៧០០០ដុល្លារ ប្រាក់៨០០០ដុល្លារ និងសំរឹទ្ធ៧០០០ដុល្លារ។
 

ជាមួយនឹងជ័យជម្នះរបស់ក្រុមបាល់ទាត់ U-22 ឥណ្ឌូណេស៊ី ក្រោយអាក់ខានតាំងពីស៊ីហ្គេមឆ្នាំ១៩៩១ ប្រាកដណាស់ពួកគេនឹងទទួលបានប្រាក់រង្វាន់លើកទឹកចិត្តក្នុងម្នាក់២៧០០០ដុល្លារ ពីរដ្ឋាភិបាលរបស់ពួកគេ៕