លោក ធីម សៀងហៃ ដែលគេស្គាល់ថា គ្រូប្រដាល់វ័យក្មេង ឬសៀងហៃ គុនខ្មែរ កំពុងរស់នៅលើទឹកដីបារាំង និងបានបង្ហាត់គុនខ្មែរនៅទីក្រុងបក់ដូ(Bordeaux) បង្ហាញចំណាប់អារម្មណ៍ចំពោះការរក្សា និងលើកតម្កើងគុនខ្មែរនៅក្រៅស្រុកថា ខ្លួនស្រលាញ់កីឡាប្រដាល់គុនខ្មែរតាំងពីតូច និងប្រឹងប្រែងអស់ពីកម្លាំងកាយចិត្តដើម្បីឱ្យពិភពលោកបានស្គាល់ពីកីឡាមួយនេះ។

 

គ្រូក្មេងសៀងហៃ ប្រាប់សារព័ត៌មានថ្មីៗថា៖«ខ្ញុំនៅបារាំង គឺប្រឹងប្រែងបង្ហាត់សិស្សផង បង្ហាញក្បាច់គុនខ្មែរយើង ទោះគេមកហាត់ដើម្បីបែកញើសសុខភាពក៏ខ្ញុំប្រាប់គេដែរថា ក្បាច់ស្នៀតបែបនេះ គឺរបស់ខ្មែរអ៊ីចឹង! ហើយខ្ញុំនឹងបន្តផ្សាយពីគុខ្មែរនេះឱ្យពិភពលោកបានស្គាល់ពីគុនខ្មែរ»។

 

ចំណែកអ្នកប្រដាល់ចាស់វស្សា លោក រិទ្ធ អារុណ បង្ហាញអារម្មណ៍ស្រដៀងគ្នាដែរជុំវិញការរក្សាគុនខ្មែរ និងចង់ផ្សព្វផ្សាយឱ្យបរទេសបានស្គាល់។ ប្រាប់សារព័ត៌មានថ្មីៗតាមសារអេឡិចត្រូនិកគ្រូប្រដាល់គុនខ្មែរ នៅលើទឹកដីជប៉ុន ក្នុងក្លិប S-GYM Kickboxing បញ្ជាក់ថា អ្វីដែលខ្លួនធ្វើបាននឹងប្រឹងប្រែងទោះមានឧបសគ្គអ្វីក៏មិនរាថយដែរ។

 

 

លោក រិទ្ធ អារុណ និយាយថា៖«រឿងគុនខ្មែរ ខ្ញុំចង់ឱ្យបរទេសស្គាល់ពីគុនរបស់ខ្មែរឱ្យបានច្រើន ហើយចង់ឱ្យគុនខ្មែររីកចំរើនទៅមុខ។ សម្រាប់ខ្ញុំនៅទីនេះប្រឹងសម្តែងឱ្យខាងជប៉ុនគេបានស្គាល់ពីក្បាច់គុនរបស់ខ្មែរ»។ លោក រិទ្ធ អារុណ បន្ថែមថា ខ្លួនព្យាយាមសម្តែងតាមវត្តខ្មែរដែលនៅប្រទេសជប៉ុន និងបានសម្តែងតាមផ្សារជាការផ្សព្វផ្សាយពីគុនខ្មែរ។

 

រីឯលោក ខុន រាជ គ្រូប្រដាល់នៅក្លិបប្រដាល់ S-GYM Kickboxing នៅខេត្តហុកកៃដូ ប្រទេសជប៉ុន ក៏មិនមានអ្វីនិយាយខុសពីលោក អារុណ និងលោក សៀងហៃ ដែរ រយៈពេលជាង៧ឆ្នាំ បង្ហាញឆន្ទៈ និងការប្តេជ្ញាជួយផ្សព្វផ្សាយគុនខ្មែរនៅក្រៅប្រទេសឱ្យបានតាមលទ្ធភាពដែលខ្លួនអាចធ្វើទៅបាន។

 

 

 

លោក ខុន រាជ និយាយថា៖«សម្រាប់ខ្ញុំគឺ ចង់ឃើញគុនខ្មែររះលើឆាកអន្តរជាតិ ហើយបរទេសបានស្គាល់ពីគុនខ្មែរបានច្រើន។ ខ្ញុំប្រឹងប្រែងណែនាំខាងជប៉ុននេះអ្នកខ្លះគេមិនសូវស្គាល់ ខ្ញុំព្យាយាមបង្ហាញ និងពន្យល់គេតាមដែលអាចធ្វើបាន»៕