មុននឹងអាជ្ញាធរ បកស្រាយពីបញ្ហាដីធ្លីតំបន់បឹងចារនេះ គឺមានការចែកចាយវីដេអូ ដោយលោក ឌុច ភាស់ លើតាមបណ្ដាញសង្គម ហើយចោទអាជ្ញាធរគប់គិតគ្នាឈូសឆាយដីបឹងចារ នៅឃុំព្រែករំដេង ស្រុកស្រីសន្ធរ។ លុះដល់ថ្ងៃទី២៤ឧសភា រដ្ឋបាលខេត្តកំពង់ចាម ក៏ចេញសេចក្ដីប្រកាសព័ត៌មានថា បុរសនោះ បានចេញមុខសុំទោស ដោយសារមានយល់ច្រឡំ។ 

 

ជាមួយគ្នាដែរ រដ្ឋបាលខេត្តក៏បានស្រាយបំភ្លឺបន្ថែមទៅសាធារណជនថា សព្វថ្ងៃនេះ ក្រុមការងារខេត្តចុះបញ្ជីដីធ្លី កំពុងធ្វើការនៅតំបន់បឹងចារ យ៉ាងយកចិត្តទុកដាក់ ហើយក៏បានហាមឃាត់ការចុះបញ្ជីដីធ្លី ដែលមានភាពមិនប្រក្រតីផងដែរ។ អាជធរ បានបញ្ជាក់ថា ករណីមានជនខិលខូចលួចឈូសឆាយតំបន់បឹងចារនេះ ដោយសារអាជ្ញាធរកំពុង រវល់ធ្វើប័ណ្ណកម្មសិទ្ធិដីធ្លី ទើបធ្វើឱ្យមានជនឆ្លៀតឱកាស ។ 

 

«ចំពោះការឈូសឆាយដីទំហំប្រហែល មួយហិកតា ជាល្បិចកលរបស់ជនខិលខូច ដែលមានចេតនាឈូសឆាយឱ្យបានស្អាត ដើម្បីបន្លំមន្ត្រីចុះវាស់វែងឱ្យបានចុះបញ្ជីដីនោះជូនពួកគេ។ ប៉ុន្តែដោយក្ដាប់បានព័ត៌មាននេះ ក្រុមការងារចម្រុះខេត្ត រួមជាមួយអាជ្ញាធរមូលដ្ឋាន បានចុះកំណត់ដីផ្ទៃបឹងចារ ដែលភូមិកេ្សរ ភូមិព្រែករំដេង ភូមិកំពង់ព្នៅ និងភូមិតាង៉កថ្មី ស្ថិតនៅឃុំព្រែករំដេង ស្រុកស្រីសន្ធរ ដើម្បីឃ្លុំរក្សាទុកជាសម្បត្តិសាធារណៈរបស់រដ្ឋរួចរាល់»។ នេះជាការបកស្រាយរបស់រដ្ឋបាលខេត្តកំពង់ចាម ។ 

 

អាជ្ញាធរអំពាវនាវឱ្យសាធារណជនបញ្ឈប់ចែកចាយព័ត៌មានមិនពិត នាំឱ្យមានការយល់ច្រឡំ។ លើសពីនេះ អាជ្ញាធរ ក៏ព្រមានចាត់វិធានការលើជនណា ដែលមានចេតនាផ្សព្វផ្សាយព័ត៌មានមិនពិត ក្នុងន័យមូលបង្កាច់លើអាជ្ញាធរ៕