លោក ភា សុភក្ដ្រា ត្រូវបានជ្រើសជាគ្រូជំនួយក្រុមជម្រើសជាតិកម្ពុជា នាដើមឆ្នាំ២០១៩។ យោងទៅលើសំណេរ របស់គ្រូជំនួយនេះ នៅលើហ្វេសបុក លោក សុភក្ដ្រា ហាក់ដូចជាយល់ថា កិច្ចការ និងតួនាទីនេះ សម្រាប់លោក គឺខ្វះខាត និងត្រូវពង្រឹងបន្ថែម។ ម្យ៉ាងវិញទៀត លោក សុភក្ដ្រា យល់ថា អាចជាឱកាសសម្រាប់អ្នកមានសមត្ថភាពណាមួយ ចូលមកជំនួសតំណែងនេះ។
 

«២០១៩-២០២៣ អរគុណ​គ្រប់យ៉ាង​មានទាំងក្រៀមក្រំ​ និងរីករាយ ទាំងការគាំទ្រលើទឹកចិត្ត និង​មតិយោបល់។ នេះជាការសម្រេចចិត្តដ៏លំបាកម្តងទៀត​ដោយផ្អែកលើគោលការណ៍៣៖ ទំនួលខុសត្រូវ, កម្រិតសមត្ថភាព និងផ្តល់ឱកាសដល់អ្នកផ្សេង។»។ លោក ភា សុភក្ដ្រា បានសរសេរ​ដូច្នេះ។
 

គ្រូជំនួយរូបនេះ ក៏បានបង្ហើបប្រាប់សារព័ត៌មានថ្មីៗតាមហ្វេសប៊ុ​កផងដែរថា ចង់សម្រាក និងទុកពេលវេលាខ្លះ សម្រាប់គ្រួសារ។
 

បន្ទាប់ពីបង្ហោះសារនេះរួច អ្នកជំនាញក្នុងវិស័យបាល់ទាត់មួយចំនួន បានសម្ដែងការសោកស្ដាយចំពោះការសម្រេចរបស់លោក សុភក្ដ្រា ដោយចាត់ទុកថានេះ គឺជាការបាត់នូវបុគ្គល ដែលមានសមត្ថភាពពីវិស័យកីឡាបាល់ទាត់។ ចំណែកអ្នកខ្លះទៀត ក៏សង្ឃឹមដែរថា លោក សុភក្ដ្រា នឹងអាចត្រឡប់មកធ្វើក្នុងវិស័យបាល់ទាត់ ហើយរួមអាជីព និងជួយវិស័យបាល់ទាត់កម្ពុជា ជាមួយគ្នា។
 

លោក អ៊ុក សុធី បានសរសេរលើហ្វេសបុកដូច្នេះថា៖«នេះជាបាល់ទាត់ ហើយខ្ញុំគោរពការសំរេចចិត្តរបស់បង។ សម្រាប់ខ្ញុំ បងជាបងប្រុសដ៍ល្អរបស់ខ្ញុំ ដែលតែងតែមើលថែប្អូនៗពេលដែលយើងមានការប្រមូលផ្តុំក្នុងស្រុក ឬពេលដែលទៅក្រៅប្រទេស ឆ្ងាយពីគ្រួសារ។ ខ្ញុំសូមជូនពរបងឲ្យទទួលជោគជ័យនាពេលខាងមុខ នឹងសង្ឃឹមថាយើងធ្វើការបាល់ទាត់ជាមួយគ្នាទៀត ដើម្បីបាល់ទាត់កម្ពុជា។»៕