កីឡាជាតិ
ជាតិ
លោក ឃឹម បុរី៖ ណាហ្គាវើលដ៏ មាន១គ្រាប់ក្នុងដៃ ប៉ុន្ដែត្រូវប្រឹងបន្ថែម និងមានស្មារតីប្រកួតខ្លាំងជាងជំនួបជើងទី១ ការប្រកួតក្រុមបាល់ទាត់ណាហ្គាវើលដ៍ និងវិសាខា នៅជំនួបជើងទី១ រូបពី Cambodian Premier League
× ដោយ៖ គឹម មករា (បាល់ទាត់, Cambodian League Cup) កីឡាជាតិ
ណាហ្គាវើលដ៍ បានយកឈ្នះលើ វិសាខា លទ្ធផល ១-០ ក្នុងវគ្គពាក់កណ្ដាល់ផ្ដាច់ព្រ័ត្រ ជំនួបជើងទី១ នៃការប្រកួតពានរង្វាន់លីគខាប់ (Cambodian League Cup) នៅកីឡដ្ឋានខេត្តកំពង់ស្ពឺ កាលពីថ្ងៃទី២២ ខែមេសា ហើយក្រុមទាំងពីរ ត្រូវជួបគ្នាម្ដងទៀត នៅយប់ម៉ោង៦:៣០ ថ្ងៃទី២៧ ខែឧសភា ឆ្នាំ២០២៣ នៅកីឡដ្ឋានព្រីនស៍។ លោក ឃឹម បុរី គ្រូបង្វឹកណាហ្គាវើលដ៍ បាននិយាយថា បើទោះជាមានភាពកក់ក្ដៅ ព្រោះមាន ១គ្រាប់ឈ្នះ ក្នុងជើងទី១ក៏ដោយ ប៉ុន្ដែក្រុមរបស់លោក ក៏ត្រូវតែមានស្មារតីប្រកួតប្រជែង និងមិនត្រូវធ្វេសប្រហែសឡើយ។
លោក ឃឹម បុរី បានប្រាប់សារព័ត៌មានថ្មីៗតាមតេលេក្រាមដូច្នេះថា ណាហ្គាវើលដ៍ បានត្រៀមខ្លួនបានយ៉ាងល្អ សម្រាប់ជំនួបជើងទី២នេះ។ ម្យ៉ាងវិញទៀត កីឡាករ ដែលមានបេសកកម្ម នៅស៊ីហ្គេម ក៏បានបញ្ចប់ ហើយត្រឡប់មកចូលរួមជាមួយក្លិបវិញដែរ។
បើទោះជាមាន ១គ្រាប់សម្រាប់ក្រុម ហើយមានភាពកក់ក្ដៅខ្លះ ដែលសម្លឹងឃើញកៅអី វគ្គផ្ដាច់ព្រ័ត្រ ប៉ុន្ដែគ្រូបង្វឹករូបនេះ នៅតែមានស្មារតីត្រៀមជានិច្ច ក្នុងជំនួបជើងទី២។ ពិតណាស់មួយគ្រាប់សម្រាប់ណាហ្គាវើលដ៍ គឺមិនទាន់កក់ក្ដៅប៉ុន្មានទេ សម្រាបក្រុម តែយ៉ាងហើយណាស់ កីឡាករ អាចមិនសូវជាមានសម្ពាធខ្លាំង សម្រាប់ការប្រកួតនៅកីឡដ្ឋានព្រីនស៍ ដែលជាទីតាំងរបស់ក្លិបវិសាខា។
«យើង មានគ្រាប់ចំណេញមួយ។ ប្រាកដណាស់ យើងពិតជាមានភាពកក់ក្តៅ ប៉ុន្តែពួកយើងត្រូវតែពង្រឹងស្មារតីយើងគ្រប់វីនាទី រហូតដល់ចប់ការប្រកួត។»។ គ្រូបង្វឹករូបនេះ បាននិយាយដូច្នេះ។
ដោយឡែក សម្រាប់ការត្រៀមខ្លួនរបស់ក្រុមវិសាខា សារព័ត៌មានថ្មីៗ មិនបានទទួលការឆ្លើយតបពី លោក Simon ដែលជាគ្រូបង្វឹកទេ៕
© រក្សាសិទ្ធិដោយ thmeythmey.com