(ជាតិ,សង្គម,កូវីដ-១៩) 

ដោយ៖ ផាត ដាណេ

ភ្នំពេញ៖ ក្រសួងសុខាភិបាល ក្រើនរម្លឹកពលរដ្ឋឱ្យបន្តការពារសុខភាព ជៀសវាងការចម្លងវីរុសកូវីដ-១៩ ប្រភេទ Omicron XBB.1.5។ ក្រសួងបានចេញសេចក្ដីក្រើនរម្លឹកនេះ នៅថ្ងៃទី២៨ ខែឧសភា ក្រោយមន្ទីរពេទ្យ Siriraj Piyamaharajkarun របស់ថៃ ប្រកាសអស់គ្រែសម្រាប់ទទួលព្យាបាលអ្នកជំងឺកូវីដ-១៩ នៅថ្ងៃទី២៧ ខែឧសភា។

«ខ្ញុំសូមក្រើនរម្លឹកជូនដល់បងប្អូនប្រជាពលរដ្ឋក្នុងប្រទេសកម្ពុជាទាំងអស់ថា ការកើនឡើងនូវករណីឆ្លងនៅតាមបណ្ដាប្រទេសជិតខាង និងនៅលើសាកលលោក ជាសញ្ញាបង្ហាញថា វីរុសកូវីដ-១៩ មិនទាន់ទៅណាឆ្ងាយពីយើងនោះទេ»។ នេះជាការក្រើនរម្លឹករបស់លោកស្រី ឱ វណ្ណឌី រដ្ឋលេខាធិការក្រសួងសុខាភិបាល។

ទន្ទឹមនឹងនេះ ក្រសួងក៏រម្លឹកពលរដ្ឋឱ្យបន្តប្រុងប្រយ័ត្នខ្លួន និងថែទាំសុខភាពផ្ទាល់ខ្លួនឱ្យបានល្អ ជៀសវាងការចម្លងវីរុសកូវីដ-១៩ ដោយស្មារតីទទួលខុសត្រូវ និងត្រៀមលក្ខណៈឱ្យបានល្អប្រសើរ ដើម្បីឆ្ពោះទៅរកការរស់នៅបានយូរអង្វែង៕