អន្តរជាតិ
កូរ៉េខាងជើង ជូនដំណឹងដល់ជប៉ុនអំពីផែនការបាញ់បង្ហោះផ្កាយរណប
× មន្ត្រីឆ្មាំសមុទ្រជប៉ុននាថ្ងៃទី២៩ ខែឧសភា បានលើកឡើងថា កូរ៉េខាងជើងបានជូនដំណឹងពីផែនការបាញ់បង្ហោះផ្កាយរណបនៅចន្លោះថ្ងៃទី៣១ ខែឧសភាដល់ថ្ងៃទី១១ ខែមិថុនា។
ទីបំផុតទៅ កូរ៉េខាងជើង នឹងបាញ់បង្ហោះផ្កាយរណបរបស់ខ្លួនដែលត្រូវជឿថា ជាផ្កាយរណបស៊ើបការណ៍យោធា។ កូរ៉េខាងជើង ក៏បានជូនដំណឹងទៅជប៉ុនពីផែនការរបស់ខ្លួន ព្រោះបំណែកផ្កាយរណបអាចធ្លាក់ចូលសមុទ្រជប៉ុន។
ប្រព័ន្ធផ្កាយរណបយោធានេះ ជាផ្នែកមួយនៃកិច្ចខិតខំរបស់កូរ៉េខាងជើងដើម្បីជំរុញបច្ចេកវិទ្យាឃ្លាំមើល និងការពង្រឹងសមត្ថភាពវាយប្រហារចំគោលដៅក្នុងស្ថានភាពសង្គ្រាមណាមួយ។
បើតាមប្រព័ន្ធផ្សព្វផ្សាយជប៉ុន NHK កូរ៉េខាងជើងបានប្រាប់ឆ្មាំឆ្នេរសមុទ្រជប៉ុនអំពីគម្រោងបាញ់បង្ហោះផ្កាយរណបយោធានេះដែលនឹងកើតឡើងនៅចន្លោះថ្ងៃទី៣១ ខែឧសភាដល់ថ្ងៃទី១១ ខែមិថុនា។ យ៉ាងណាមិញ ជប៉ុនបានប្រាប់ឱ្យកូរ៉េខាងជើងផ្អាកសកម្មភាពរបស់ខ្លួន។
«យើងជំរុញយ៉ាងមុតមាំឱ្យកូរ៉េខាងជើងបញ្ឈប់ការបាញ់បង្ហោះ»។ ការិយាល័យនាយករដ្ឋមន្ត្រីជប៉ុនបានបង្ហោះសារលើបណ្ដាញសង្គម Twitter បែបនេះ ដោយបន្ថែមថា ជប៉ុននឹងសហការ ជាមួយប្រទេសពាក់ព័ន្ធដូចជាអាម៉េរិក និងកូរ៉េខាងត្បូង។ រដ្ឋាភិបាលជប៉ុនសន្យានឹងធ្វើអស់ពីសមត្ថភាពដើម្បីប្រមូល និងវិភាគព័ត៌មានពីការបាញ់បង្ហោះនេះផងដែរ។
លទ្ធភាពនៃការបាញ់ផ្កាយរណបមានកាន់តែច្រើនក្រោយមេដឹកនាំកូរ៉េខាងជើង គីម ជុងអ៊ុន បានទៅត្រួតពិនិត្យស្ថានីយ៍បាញ់ផ្កាយរណបយោធាដោយផ្ទាល់ ហើយបានជំរុញផែនការបាញ់បង្ហោះផ្កាយរណបជាលើកដំបូងទៀតផង៕
© រក្សាសិទ្ធិដោយ thmeythmey.com