ថ្លែងក្នុងពិធីប្រកួតបាល់បោះលើរទះប៉ារ៉ាហ្គេម លោក ហង់ ជួន ណារ៉ុន បានបញ្ជាក់ថា យុវជន ដែលមានពិការភាព អាចជ្រើសរើសប្រភេទកីឡាណាមួយ ដែលសមស្របទៅតាមលទ្ធភាពរបស់ខ្លួន ដើម្បីឈានទៅអភិវឌ្ឍន៍សមត្ថភាព ។ 
 

 

តាមរយៈកិច្ចសម្ភាសជាមួយសារព័ត៌មានថ្មីៗ រដ្ឋមន្រ្តីអប់រំរូបនេះ បានពន្យល់ថា៖«យុវជន ដែលមានពិការភាព គឺគាត់អាចចាប់ផ្ដើមលេងកីឡា ហើយក៏ជាឱកាសមួយ ដើម្បីឱ្យគាត់អាចអភិវឌ្ឍន៍ខ្លួនឯង ក្លាយទៅជាអ្នកឯករាជ្យ ក្លាយទៅជាអ្នកកីឡាអាជីព ហើយអាចឱ្យគាត់រស់នៅ ក្នុងសង្គមដោយទទួលបាននូវការគោរព ការរាប់អាន ។ ហើយនៅពេលពួកគាត់លេងល្បីទៀត គាត់ក៏ក្លាយទៅជាតារានៅក្នុងសង្គមផងដែរ»។
 

បើតាមលោក ណារ៉ុន វិស័យកីឡាអាចបណ្ដុះយុវជនពិការភាព ឱ្យក្លាយទៅមនុស្សមានសក្ដានុពល និងមានកិត្តិយស កេរ្តិ៍ឈ្មោះល្បីល្បាញ។ 
 

កន្លងមកក្រសួងអប់រំ ក៏បានរៀបចំកន្លែងលេងកីឡា នៅតាមទីធ្លាសាលារៀននានា សម្រាប់សិស្សានុសិស្ស យុវជន និងអ្នកមានពិការភាព ចូលរួមលេង និងប្រកួត ដើម្បីលើកកម្ពស់វិស័យកីឡា នៅកម្ពុជា។ នេះបើតាមរដ្ឋមន្រ្តីអប់រំ៕