ជាតិ
ស៊ីហ្គេម២០២៣
បីសំណួរទៅកាន់កញ្ញា អ៊ុត រស្មី អំពីបទពិសោធយកព័ត៌មាននៅស៊ីហ្គេម និងអាស៊ានប៉ារ៉ាហ្គេម
× ជាអ្នកព័ត៌មានជំនាញខាងសុខភាព និងសង្គម ប៉ុន្តែកញ្ញា អ៊ុត រស្មី ក៏ដូចជាសមាជិកក្រុមការងារផ្សេងទៀតនៃអង្គភាពសារព័ត៌មានឌីជីថលថ្មីៗ បានសហការចុះរាយការណ៍អំពីព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមជាប្រវត្តិសាស្ត្រនៅកម្ពុជា។
កញ្ញា រស្មី ដែលមានតួនាទីជាការីនិពន្ធ ThmeyThmey25 ផងដែរនោះ ចែករំលែកបទពិសោធក្នុងការចុះយកព័ត៌មានកីឡាជាលើកដំបូងរបស់ខ្លួន ជាមួយនឹងការចងចាំដែលមិនអាចបំភ្លេចបាន។
កញ្ញា រស្មី បានឆ្លើយតបទៅនឹងបីសំណួរដូចខាងក្រោម៖
តើអ្វីជាការចងចាំដែលមិនអាចបំភ្លេចបានសម្រាប់ រស្មី ចំពោះបទពិសោធយកព័ត៌មានអំពីស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ជាប្រវត្តិសាស្ត្រនៅកម្ពុជា?
កញ្ញា អ៊ុត រស្មី៖ ពិតជាការចងចាំដ៏ពិសេសមួយសម្រាប់ខ្ញុំ ព្រោះនេះជាលើកទីមួយដែលខ្ញុំបានយកព័ត៌មានទាក់ទងនឹងកីឡា ហើយជាពិសេសខ្ញុំអត់មានជំនាញវិស័យកីឡា និងមិនស្គាល់កីឡាច្រើនដែរ ដោយស្គាល់យ៉ាងច្រើនតែបាល់បោះ និងបាល់ទាត់ប៉ុណ្ណោះ។ តែនៅពេលដែលបានយកព័ត៌មានស៊ីហ្គេម និងប៉ារ៉ាហ្គេមនេះ ធ្វើឲ្យស្គាល់ប្រភេទកីឡាជាច្រើន។ អ្វីដែលជាការចងចាំនោះ គឺនៅពេលដែលឃើញការទទួលបានជោគជ័យនៃការប្រកួតនីមួយៗ។ អត្តពលិកញញឹម ខ្ញុំក៏ញញឹម និងសប្បាយចិត្តដូចពួកគាត់ដែរ។ ម្យ៉ាងទៀត ក្រៅពីលទ្ធផលចាញ់ឈ្នះរបស់កីឡាករ-កីឡាការិនី
ពោលគឺលើសពីការប្រកួត ខ្ញុំមានរឿងជាច្រើនទៀតដែលចងចាំមិនអាចបំភ្លេចបាន។
បេសកកម្មក្នុងតួនាទីជាអ្នកយកព័ត៌មានកីឡាប្រចាំព្រឹត្តិការណ៍ដ៏ធំ តើពិបាកដែរឬទេ?
កញ្ញា អ៊ុត រស្មី៖ ពិបាកបង! ក្នុងវិស័យកីឡា ខ្ញុំថ្មី ថ្មីចែស នៅស៊ីហ្គេម។ ខ្ញុំបានតាមបាល់បោះ៣ទល់៣ ពេលមើលដំបូងៗ មិនដឹងថា ពិន្ទុប៉ុន្មាន អី្វប៉ុន្មាននោះទេ គឺទទេស្អាត។ ក្រោយមើលពីរបីប្រកួត និងតាមដានជាប្រចាំ និងសួរបន្ថែមពីសហការីជំនាញកីឡា ខ្ញុំកាន់តែចេះច្បាស់ពីរបៀបនៃការលេង។ ខ្ញុំក៏បានឈ្វេងយល់ពីរបៀបសួរសំណួរ លើប្រភេទកីឡាដែលខ្លួនបានតាម។ ចំពោះប៉ារ៉ាអត្តពលកម្មដែលខ្ញុំត្រូវទទួលបន្ទុកក្នុងប៉ារ៉ាហ្គេមវិញ ថ្ងៃដំបូងៗ ពិបាកខ្លាំង ដោយសារតែមានការរឹតត្បិតចំពោះការថតរូប អ៊ីចឹងខ្ញុំរាយការណ៍ និងផ្តិតរូបភាពមិនបានល្អឡើយ។ កីឡានេះ មានការប្រកួតច្រើនក្នុងពេលតែមួយ តាមអត់ទាន់ ហើយការប្រកួតទៀតសោត ភាគច្រើនគឺវគ្គផ្តាច់ព្រ័ត្រដណ្តើមមេដាយតែម្តង ដូច្នេះខ្ញុំមិនបានមើលការប្រកួតពេញភ្នែកនោះឡើយ ហើយវិញ្ញាសាខ្លះ ខ្ញុំទៅដល់ពេលដែលកីឡាករប្រកួតឈ្នះចាញ់ និងបានមេដាយរួចទៅហើយ។
អារម្មណ៍បែបណាដែរចំពោះលទ្ធផលនៅស៊ីហ្គេម និងអាស៊ានប៉ារ៉ាហ្គេម?
កញ្ញា អ៊ុត រស្មី៖ ខ្ញុំសប្បាយរីករាយដូចគ្នា ចំពោះលទ្ធផលនៃជ័យជម្នះនៅស៊ីហ្គេម និងប៉ារ៉ាហ្គេម។ ប៉ុន្តែអាចមានអារម្មណ៍ខុសគ្នាបន្តិចចំពោះជោគជ័យអត្តពលិកប៉ារ៉ាហ្គេម។ ខ្ញុំជាអ្នកសារព័ត៌មាន ខ្ញុំបានក្លាយជាអ្នកជិតស្និទ្ធរបស់អត្តពលិកមួយចំនួន។ នៅពីក្រោយភាពជោគជ័យ ពួកគាត់មានរឿងជាច្រើន ដែលមានការតស៊ូខ្ពស់ ជាពិសេសអ្នកមានបញ្ហាសុខភាព។ អ្នកខ្លះមិនទទួលបានជោគជ័យក៏ពិតមែន ប៉ុន្តែពួកគាត់មិនបង្ហាញភាពទន់ខ្សោយនោះឡើយ ពួកគាត់ក្លាហាន មិនបាក់ទឹកចិត្ត។ ជាពិសេសអត្តពលិកវិញ្ញាសារត់ចម្ងាយ ពួកគាត់ប្រឹងប្រែងណាស់ដើម្បីរត់ឱ្យដល់គោលដៅទាំងដៃម្ខាង ជើងម្ខាង ឬពិការភ្នែក។ពេលទៅដល់គោលដៅ ខ្ញុំសង្កេតឃើញថា ពួកគាត់តែងតែរីករាយ និងអបអរចំពោះខ្លួនឯង៕
© រក្សាសិទ្ធិដោយ thmeythmey.com