នាសន្និសីទសារព័ត៌មានស្តីពីដំណើរការប្រកួតអាស៊ានប៉ារ៉ាហ្គេមលើកទី១២ ឆ្នាំ២០២៣ នៅមជ្ឈមណ្ឌលព័ត៌មានកណ្តាល (MPC) ល្ងាចថ្ងៃទី៨ ខែមិថុនា លោក ផុស សុវណ្ណ បានបង្ហាញក្តីរីករាយ បន្ទាប់ពីប៉ារ៉ាហ្គេមបានដំណើរការរលូនរយៈពេល៨ថ្ងៃមកនេះ។

 

 

«ខ្ញុំរីករាយដែលប៉ារ៉ាហ្គេមលើកទី១២ រៀបចំដោយជោគជ័យ។ ខ្ញុំក៏សូមអរគុណដល់អ្នកសារព័ត៌មានទាំងអស់ដែលរួមចំណែកផ្សព្វផ្សាយស៊ីហ្គេម និងអាស៊ានប៉ារ៉ាហ្គេមទៅកាន់ពិភពលោក» នេះជាការលើកឡើងរបស់ប្រធានគណៈកម្មការផ្សព្វផ្សាយរបស់ CAMSOC និង CAMPDOC។

 

 

ដោយឡែកនៅទីតាំងមជ្ឈមណ្ឌលព័ត៌មានកណ្តាល (MPC) ក្នុងបរិវេណពហុកីឡដ្ឋានជាតិមរតកតេជោ មានអ្នកសារព័ត៌មាន៥០០នាក់ក្នុងមួយថ្ងៃមកធ្វើការនៅទីនេះ។ MPC ក៏មានផ្តល់អ៊ីនធឺណិត និងអាហារសម្រន់សម្រាប់អ្នកសារព័ត៌មានជាតិ និងអន្តរជាតិផងដែរ។

 

គិតត្រឹមថ្ងៃទី៨ ខែមិថុនា ឥណ្ឌូណេស៊ីកំពុងនាំមុខក្នុងតារាងមេដាយបណ្តោះអាសន្ន ដោយទទួលបានមេដាយមាស១៤៤ ប្រាក់ ១២៩ និងសំរឹទ្ធ ៨៧។ ដោយឡែក ម្ចាស់ផ្ទះកម្ពុជា ស្ថិតនៅចំណាត់ថ្នាក់ទី៨ ដោយទទួលបានមេដាយមាស៩ ប្រាក់១៨ និងសំរឹទ្ធ៤២ សរុប៦៩មេដាយ៕