ជាតិ
លោក ឯម រៀម សុំទោស និងលុបរូបអាសចេញ ក្រោយក្រសួងវប្បធម៌ ព្រមាន
× ភ្នំពេញ៖ ក្រុមប្រឹក្សាវិន័យ និងលើកសរសើរនៃអ្នកសិល្បៈ តម្រូវឱ្យលោក ឯម រៀម លុបរូបភាពដែលមានលក្ខណៈអាសជាបន្ទាន់ ចេញពីគ្រប់បណ្ដាញផ្សព្វផ្សាយសង្គម។ ប្រសិនលោក ឯម រៀម មិនអនុវត្តិតាមសេចក្ដីជូនដំណឹងនេះទេ ក្រុមប្រឹក្សាវិន័យនិងលើកសរសើរនៃអ្នកសិល្បៈ នឹងចាត់វិធានការទៅតាមផ្លូវច្បាប់ ដែលមានជាធរមាន។
ក្រុមប្រឹក្សាវិន័យនិងលើកសរសើរ ពិនិត្យឃើញថាលោក ឯម រៀម បានបង្ហោះជាសាធារណៈរូបភាពមានលក្ខណៈអាស ដែលបណ្ដាលឱ្យប៉ះពាល់ដល់វប្បធម៌ ប្រពៃណី និងសេចក្ដីថ្លៃថ្នូររបស់សង្គមជាតិយ៉ាងធ្ងន់ធ្ងរ។ ក្រសួងបញ្ជាក់ថា ករណីដូចគ្នានេះ លេខាធិការដ្ឋានក្រុមប្រឹក្សាវិន័យ និងលើកសរសើរនៃអ្នកសិល្បៈ ក៏ធ្លាប់បានអញ្ជើញលោក រៀម ទៅណែនាំ អប់រំចំពោះទង្វើបែបនេះម្ដងរួចមកហើយ។
ស្របពេលជាមួយគ្នានេះ លោក ឯម រៀម បានសុំទោសនៅលើហ្វេសប៊ុក EM Riem ចំពោះរូបភាពដែលលោកបានបង្ហោះនោះ និងបានបញ្ជាក់ថាលោកបានលុបរូបនោះរួចរាល់ហើយ កាលពី៩ម៉ោងមុន។
ក្រសួងវប្បធម៌សង្ឃឹមថាលោក ឯម រៀម នឹងអនុវត្តតាមសេចក្ដីជូនដំណឹងនេះ ដោយបញ្ឈប់រាល់ការប្រើប្រាស់រូបភាព ដែលនាំឱ្យមានផលប៉ះពាល់ដល់ ទំនៀមទម្លាប់ប្រពៃណីជាតិ ហើយងាកមកប្រើប្រាស់ទេពកោសល្យ ដែលខ្លួនមានចូលរួមលើកស្ទួយវប្បធម៌ជាតិឡើងវិញ៕
© រក្សាសិទ្ធិដោយ thmeythmey.com