បទចោទប្រកាន់នេះធ្វើឡើងបន្ទាប់ពីការស៊ើបអង្កេតដ៏យូរទាក់ទងនឹងការកាន់កាប់ឯកសារសម្ងាត់ដែលលោក Trump យកតាម នៅពេលលោកចាកចេញពីតំណែងហើយនិងការស៊ើបអង្កេតថាតើលោកបានរារាំងកិច្ចខិតខំប្រឹងប្រែងរបស់រដ្ឋាភិបាលក្នុងការទាមទារយកឯកសារមកវិញដែរឬទេ។

 

ការចោទប្រកាន់នៅឯតុលាការសហព័ន្ធក្នុងទីក្រុង Miami នេះគឺជាករណីទីមួយក្នុងប្រវត្តិសាស្ត្រអាមេរិកដែលអតីតប្រធានាធិបតីប្រឈមនឹងការចោទប្រកាន់ទោសកម្រិតសហព័ន្ធ។

កាសែត The New York Times រាយការណ៍ថាការណ៍នេះធ្វើឱ្យប្រទេសជាតិស្ថិតក្នុងស្ថានភាពមិនធម្មតា ព្រោះថាឋានៈរបស់លោក Trump មិនត្រឹមតែជាអតីតមេដឹកនាំអង្គនីតិប្រតិបត្តិ (រដ្ឋាភិបាល)តែប៉ុណ្ណោះទេ ប៉ុន្តែថែមទាំងជាអ្នកប្រជែងនាំមុខគេដែលត្រូវជ្រើសតាំងជាបេក្ខជនប្រធានាធិបតីមកពីគណបក្សសាធារណរដ្ឋក្នុងការបោះឆ្នោតឆ្នាំ២០២៤ ដើម្បីប្រកួតប្រជែងនឹងលោកប្រធានាធិបតី Joe Biden ដែលរដ្ឋបាលរបស់លោកឥឡូវនេះស្វែងរកការកាត់ទោសគូប្រជែងដ៏មានសក្តានុពលរបស់លោក៕