ជាតិ
CDC អនុម័តលើគម្រោងវិនិយោគរបស់ក្រុមហ៊ុន៣ ដែលបោះទុន១៦លានដុល្លារ នៅស្វាយរៀង រូបភាពពី៖ក្រុមប្រឹក្សាអភិវឌ្ឍន៍កម្ពុជា
×
ដោយ៖ សែម ប្រាក់ដាវ
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តឱ្យក្រុមហ៊ុនថ្មីចំនួន៣ទៀត ដែលមានទុនវិនិយោគប្រមាណ១៦លានដុល្លារ បង្កើតរោងចក្រនានានៅខេត្តស្វាយរៀង។ ក្រុមហ៊ុនវិនិយោគទាំង៣នេះ នឹងផ្តល់ឱ្យការងារដល់ពលរដ្ឋ បានជាង៣០០០កន្លែង។ នេះបើតាមការចុះផ្សាយរបស់ CDC នៅថ្ងៃទី៩ ខែមិថុនា ឆ្នាំ២០២៣។
ក្រុមហ៊ុនទាំង៣ ដែលCDC បានចេញវិញ្ញាបនបត្រចុះបញ្ជីជាស្ថាពរ ដើម្បីឱ្យអនុវត្តគម្រោងវិនិយោគនៅកម្ពុជានោះ មាន ក្រុមហ៊ុន “QINGDAO ZHONGMIAN (CAMBODIA) KNITTING CO., LTD. បានស្នើសុំវិនិយោគលើគម្រោងបង្កើតរោងចក្រកាត់ដេរ និងចាក់សម្លៀកបំពាក់ នៅទីតាំងស្ថិតតំបន់សេដ្ឋកិច្ចពិសេស ឈីលូ ជាន ពុ ចាយ ក្នុងខេត្តស្វាយរៀង។ រោងចក្រនេះ មានដើមទុនវិនិយោគប្រមាណ ៦,៨លានដុល្លារអាម៉េរិក ដែលអាចបង្កើតការងារបានចំនួន ២ ៤១០កន្លែង។
ជាមួយគ្នានេះ ក្រុមហ៊ុន HUIYAO YAOXING PLASTIC PACKAGING PRODUCTS (CAMBODIA) CO., LTD ក៏បានស្នើរសុំវិនិយោគលើគម្រោងបង្កើតរោងចក្រផលិតបាវ និងសម្ភារៈវេចខ្ចប់គ្រប់ប្រភេទ ក្រោមដើមទុនវិនិយោគប្រមាណ ៥,៧លានដុល្លារអាម៉េរិក ដែលអាចបង្កើតការងារបានចំនួន ៤៩៥កន្លែង។ រោងចក្រនេះ មានតាំងនៅតំបន់សេដ្ឋកិច្ចពិសេស ឈីលូ ជាន ពុ ចាយ ក្នុងខេត្តស្វាយរៀង។
បន្ថែមពីនេះ ក្រុមហ៊ុន DONG WANG PAPER INDUSTRY (CAMBODIA) CO., LTD គម្រោងបង្កើតរោងចក្រផលិតកេសកាតុង និងសម្ភារៈវេចខ្ចប់ ដែលមានទីតាំងនៅតំបន់សេដ្ឋកិច្ចពិសេស ហាយ-ផាក ក្នុងខេត្តស្វាយរៀង។ រោងចក្រនេះ មានទុនវិនិយោគប្រមាណ ៣,៥លានដុល្លារអាម៉េរិក និងអាចបង្កើតការងារបានចំនួន ៥៨៦កន្លែងផងដែរ៕
Tag:
ការអនុម័តពី CDC
ស្វាយរៀង
© រក្សាសិទ្ធិដោយ thmeythmey.com