ជាតិ
បទសម្ភាសន៍
វីដេអូ
វិចិត្រករ សេង វិសុទ្ធ ពន្យល់ពីបច្ចេកទេសគូរគំនូរសម្រាប់សៀវភៅកុមារ
× ភ្នំពេញ៖ ការគូររូបនៅក្នុងសៀវភៅរឿងសម្រាប់កុមារ ពុំមែនចេះតែគូរទៅតាមការនឹកឃើញនោះឡើយ។ ប៉ុន្តែគេបែងចែកប្លង់គំនូរ និងអក្សរច្បាស់លាស់ ទៅតាមកម្រិតអាយុរបស់កុមារ។ ការបែងចែកប្លង់នេះ គឺផ្ដោតលើចិត្តសាស្ត្ររបស់កុមារទូទៅ ដែលចាប់អារម្មណ៍លើគំនូរ ក្នុងទម្រង់បែបណា។
ដើម្បីជ្រាបច្បាស់ សូមលោកអ្នកនាង ទស្សនាកិច្ចសម្ភាសរវាង កញ្ញា ប៉ូ សាគុន អ្នកសារព័ត៌មាននៃសារព័ត៌មានឌីជីថលថ្មីៗ និងលោក សេង វិសុទ្ធ អ្នករចនាក្រាហ្វិក និងវិចិត្រករ ដូចតទៅ៖
លោក សេង វិសុទ្ធ អ្នករចនាក្រាហ្វិក និងជាវិចិត្រករ បានប្រាប់សារព័ត៌មានថ្មីៗថា កុមារមានការចាប់អារម្មណ៍លើរូបខ្លាំង ដូច្នេះទាមទារឱ្យការផលិតសៀវភៅសម្រាប់កុមារ មានរូបច្រើនជាងអក្សរ។ បន្ថែមពីនោះ រូបភាពសម្រាប់កុមារ ក៏ត្រូវតែមានពណ៌ស្រស់ៗ និងមានពន្លឺច្រើន ដើម្បីទាញចំណាប់អារម្មណ៍របស់កុមារដែរ។ ជាងនោះទៅទៀត រូបនីមួយៗត្រូវតែបែងចែកខណ្ឌ ពីរូបមួយទៅរូបមួយទៀតឱ្យច្បាស់ ទើបកុមារអាចបែងចែករូបនោះបានច្បាស់ ហើយពួកគេងាយស្រួលចំណាំ។
«កុមារកាន់តែតូច ប្លង់រូបកាន់តែធំ ហើយប្លង់អក្សរតិចជាង។ នៅស៊ីប៉ាយើងគូររូប បែងចែកអាយុកុមារពី០ឆ្នាំទៅ៦ឆ្នាំ និងពី៦ឆ្នាំទៅ១២ឆ្នាំ និងដេញទៅលើរហូតដល់មនុស្សពេញវ័យ។ ដូច្នេះបើកុមារមានអាយុច្រើន យើងគូររូបលម្អិតជាងកុមារដែលមានអាយុតិចខ្លាំង»។ នេះជាការពន្យល់បន្ថែម របស់លោក វិសុទ្ធ។
យ៉ាងណាក៏ដោយ សៀវភៅរឿងកុមារមួយក្បាល មានអ្នកនិពន្ធអត្ថបទរឿងផ្សេង ហើយអ្នកគូររូបផ្សេងទៀត។ ដើម្បីឱ្យគំនូរមួយផ្ទាំងៗ ឬសៀវភៅមួយក្បាល មានរូបស៊ីគ្នាជាមួយអត្ថបទ ទាំងអ្នកនិពន្ធ និងវិចិត្រករ ត្រូវជំនុំពិភាក្សាគ្នាច្រើន។ បន្ថែមពីនោះ ដើម្បីឱ្យសៀវភៅមួយក្បាលនោះ ពោរពេញដោយភាពទាក់ទាញ តម្រូវឱ្យមានអ្នកកែសម្រួលទាំងរូប និងអត្ថបទ មួយរូបផ្សេងទៀត។
លោក វិសុទ្ធ ដែលមានបទពិសោធ គូររូបតាំងពីឆ្នាំ២០០៤អះអាង៖ «សៀវភៅដែលមានតែអ្នកគូរ និងអ្នកសរសេរធ្វើការតែពីរនាក់ នៅមានចំណុចខ្វះចន្លោះច្រើន។ អាចនិយាយថា គំនូរនិងអត្ថបទ មិនសូវស៊ីចង្វាក់គ្នានៅផ្នែកខ្លះ។ ដូច្នេះបើមានអ្នកសម្របសម្រួលម្នាក់ សៀវភៅមួយក្បាលនោះ មានភាពទទួលយកបានខ្ពស់»៕
Tag:
តោះអានជុំគ្នា
អប់រំ
អំណាន
គំនូរ
កុមារ
សៀវភៅ
សៀវភៅរឿង
© រក្សាសិទ្ធិដោយ thmeythmey.com