Djokovic គ្រងជើងឯក French Open និងជាកំណត់ត្រា Grand Slam ទី២៣

កីឡាអន្តរជាតិ

អន្តរជាតិ

Djokovic គ្រងជើងឯក French Open និងជាកំណត់ត្រា Grand Slam ទី២៣

12, Jun 2023 , 9:25 am

រូបភាព

ដោយ: ទេព ពិទូរ្យ

Novak Djokovic បានក្លាយជាម្ចាស់ជើងឯក French Open ឆ្នាំ២០២៣ ក្រោយយកឈ្នះគ្រូប្រជែង Casper Ruud វគ្គផ្តាច់ព្រ័ត្រ ក្នុងលទ្ធផល ៧-៦(១), ៦-៣ និង ៧-៥នៅថ្ងៃទី១១ ខែមិថុនា។ តាមរយៈជ័យជម្នះនេះ បានជួយកំពូលកីឡាករវាយកូនបាល់ស៊ែប៊ីឈ្នះ Grand Slam ច្រើនជាងគេជាកំណត់ត្រាចំនួន២៣លើក។

កីឡាករវាយកូនបាល់លំដាប់ទី១ពិភពលោក វ័យ៣៦ឆ្នាំ បានស្មើកំណត់ត្រារបស់ Rafa Nadal ដែលគ្រង Grand Slam បន្ទាប់ពីឈ្នះ Australian Open កាលពីថ្ងៃទី២២ ខែមករា។ ៥ខែក្រោយ Djokovic បានបំបែកកំណត់ត្រារបស់ Nadal ដែលជា King of Clay ដោយដណ្តើមបានពានរង្វាន់ Roland Garros នៅទឹកដីបារាំងជាលើកទី៣ (២០១៦,២០២១ និង២០២៣)។

«ការប្រកួតដ៏ធំបំផុតទាំងបួន Australian Open, French Open, Wimbledon និង US Open សុទ្ធជាពានរង្វាន់ ដែលកីឡាករកីឡាការិនីម្នាក់ៗស្រមៃចង់ឈ្នះ យ៉ាងហោចណាស់១លើកក្នុងអាជីព។ ខ្ញុំពិតជាសំណាងណាស់ក្នុងជីវិតរបស់ ដែលឈ្នះវា ២៣ដងដ៏មិនគួរឱ្យជឿ»។ នេះជាការលើកឡើងរបស់ Djokovic ក្រោយឈ្នះកីឡាករន័រវែស Casper Ruud ដើម្បីលើកពាន French Open នៅទីលាន Court Philippe Chatrier ក្រុងប៉ារីស។

Djokovic បានតាមស្មើកំណត់ត្រារបស់កីឡាការិនីអាម៉េរិក Serena Williams ដែលកាន់កំណត់ត្រា Grand Slam ២៣លើក។ អតីតកីឡាការិនីវាយកូនបាល់អូស្ត្រាលី Margaret Court កាន់កំណត់ត្រា Grand Slam ច្រើនជាងគេបង្អស់២៤លើក។

ក្នុងចំណោមកីឡាករវាយកូនបាល់ដែលធ្លាប់ឈ្នះ Grand Slam លើសពី១០ដង មានតែ៤រូបប៉ុណ្ណោះ ក្នុងនោះ Djokovic ២៣លើក Rafa Nadal ២២លើក Roger Federer របស់ស្វ៊ីស ២០លើក និង Pete Sampras របស់អាម៉េរិក ១៤លើក៕