Neymar ៖ Messi នឹងជួយឱ្យលីគបាល់ទាត់អាម៉េរិក MLS ល្បីល្បាញ

កីឡាអន្តរជាតិ

អន្តរជាតិ

Neymar ៖ Messi នឹងជួយឱ្យលីគបាល់ទាត់អាម៉េរិក MLS ល្បីល្បាញ

13, Jun 2023 , 11:59 am

រូបភាព

ដោយ: ជា យូគៀង

Neymar Jr ខ្សែប្រយុទ្ធ Paris Saint Germain ជឿជាក់ថា Lionel Messi នឹងជួយឱ្យក្របខណ្ឌលីគកីឡាបាល់ទាត់កំពូលអាម៉េរិក Major League Soccer កាន់តែល្បី និងទាក់ទាញ នៅពេលរូបគេទៅចូលរួមក្រុម Inter Miami។

Messi វ័យ ៣៥ឆ្នាំ កាលពីថ្ងៃទី៧ ខែមិថុនា បានប្រកាសអំពីគម្រោងដែលរូបគេនឹងធ្វើដំណើរទៅកាន់ទឹកដីអាម៉េរិក បន្ទាប់ពីកិច្ចសន្យារបស់គេជាមួយក្រុមជើងខ្លាំងប្រចាំបារាំង និងម្ចាស់ពាន Ligue 1 បានផុតកំណត់នៅចុងខែមិថុនានេះ។

Neymar បាននិយាយដូច្នេះថា៖«ខ្ញុំបានដឹងរួចហើយ Messi គឺជាមិត្តល្អមួយរូបរបស់ខ្ញុំ វាពិតជាអំណោយដ៏ល្អបំផុតដែលបាល់ទាត់បានផ្តល់មកឱ្យខ្ញុំនូវឱកាសដែលបានជួបគេ លេងជាមួយគេ និងមិត្តភាពដ៏ស្រស់ស្អាត។ ខ្ញុំបានប្រាប់គេថា គេនឹងទទួលបានការរីករាយជាមួយនឹងទីក្រុង របៀបនៃការរស់នៅដ៏ស៊ីវីល័យ និងឱកាសរស់នៅទីនោះ ហើយលេងនៅក្នុង Miami។ ខ្ញុំជឿថា Messi នឹងផ្លាស់ប្តូរលីគរបស់អាម៉េរិក ហើយលីគនឹងមានភាពល្បីល្បាញខ្លាំងឡើង។»។

ខ្សែប្រយុទ្ធសញ្ជាតិប្រេស៊ីល និង Messi ជាអតីតមិត្តរួមក្រុមនៅក្រុម Barcelona ពួកគេទាំងពីរបានទៅទស្សនកិច្ចការប្រកួតកីឡាបាល់បោះក្របខណ្ឌ NBA នៅរដ្ឋ Florida កាលពីថ្ងៃទី១៦ ខែមិថុនា។ តារាបាល់ទាត់ទាំងពីរក៏បានទៅជួបកីឡាបាល់បោះដ៏ល្បី Jimmy Butler នៅក្នុងការប្រកួតនោះ។

អ្វីដែលគួរឱ្យចាប់អារម្មណ៍កីឡាករ Butler ដែលជាកីឡាករមានឈ្មោះជាប់ក្នុងបញ្ជីកីឡាករឆ្នើម NBA ៦សម័យ ក៏ធ្លាប់បាននិយាយថារូបគេពិតជាមានចំណាប់អារម្មណ៍ខ្លាំងអំពីការផ្លាស់មកកាន់ក្លិប Inter Miami ពីសំណាក់ខ្សែប្រយុទ្ធក្រុមអាហ្សង់ទីន និងជាម្ចាស់ពានរង្វាន់ World Cup 2022៕