កាលពីថ្ងៃទី១៧ ខែមិថុនា ឆ្នាំ២០២៣ លោក ថេង សាវឿន ដែលជាសមាគមសម្ព័ន្ធសហគមន៍កសិករកម្ពុជា បានដឹកនាំសហការីចូលទៅជួបសម្តេចនាយករដ្ឋមន្រ្តី ហ៊ុន សែន។ សម្តេច សរសេរក្នុងបណ្តាញតេឡេក្រាមថា ជំនួបនេះ ត្រូវបានរៀបចំឡើង ដើម្បីស្តាប់រឿង ដែលកើតឡើងកន្លងមក និងសកម្មភាពរបស់សមាគម។
 

សម្តេចនាយករដ្ឋមន្រ្តី បញ្ជាក់ថា៖«យើង ពិនិត្យឃើញផលប្រយោជន៍ ដែលសមាគមបានធ្វើ ដូចនេះខ្ញុំ បានលើកទឹកចិត្តឲ្យសមាគមបន្តសកម្មភាព ដើម្បីផលប្រយោជន៍ប្រជាជនយើង និងបន្ថែមឲ្យសមាគមយកចិត្តទុកដាក់លើកិច្ចការពារចំពោះកម្មករក្នុងវិស័យកសិកម្មផងដែរ»។
 

មុន១ថ្ងៃនៃការជួបជាមួយប្រមុខរដ្ឋាភិបាល លោក ថេង សាវឿន បង្ហោះសារខ្លីលើទំព័រហ្វេសប៊ុករបស់ខ្លួនថា៖«យើង បានបោះមួយជំហានឆ្ពោះទៅមុខប្រកបដោយក្ដីសង្ឃឹម និងភាពវិជ្ជមានក្នុងការបន្តចូលរួមចំណែកជួយដល់កសិករជនបទ និងអភិវឌ្ឍប្រទេសជាតិរបស់យើងទាំងអស់គ្នា»។
 

កាលពី១ខែមុន គឺក្នុងអំឡុងខែឧសភា លោក ថេង សាវឿន រួមទាំងសហការី២នាក់ទៀត ត្រូវបានចាប់ខ្លួនយកទៅឃុំនៅពន្ធនាគារខេត្តរតនគិរី ក្រោមបទរួមគំនិតក្បត់ (ជាតិ) និងបទញុះញង់បង្កឲ្យមានអសន្តិសុខសង្គម ហើយត្រូវបានតុលាការដោះលែងវិញក្នុងខែឧសភាដដែល ក្រោយសារភាពពីទោសកំហុសរបស់ខ្លួន និងសុំកិច្ចអន្តរាគមន៍ទៅកាន់សម្តេច ហ៊ុន សែន។ យ៉ាងណា អ្នកទាំង៣ គ្រាន់តែត្រូវបានដោះលែងបណ្តោះអាសន្នប៉ុណ្ណោះ ដោយពួកគេ នៅតែជាប់បទចោទប្រកាន់ទាំង២ខាងលើដដែល ហើយថែមទាំងត្រូវស្ថិតក្នុងការត្រួតពិនិត្យរបស់តុលាការទៀតផង។   
 

ដោយសារសំណុំរឿងរបស់ថ្នាក់ដឹកនាំ មិនទាន់ត្រូវបានបញ្ចាប់ ទើបក្រសួងមហាផ្ទៃ សម្រេចផ្អាកសកម្មភាពរបស់សមាគមសម្ព័ន្ធសហគមន៍កសិករកម្ពុជាជាបណ្តោះអាសន្ន។ តាមរយៈសេចក្តីសម្រេច ដែលចេញក្នុងខែមិថុនានេះ ក្រសួងមហាផ្ទៃ សម្រេចផ្អាកសកម្មភាពរបស់សមាគមសម្ព័ន្ធសហគមន៍កសិករកម្ពុជា រហូតដល់តុលាការខេត្តរតនគិរី បញ្ចប់នីតិវិធីជាស្ថាពរក្នុងសំណុំរឿងលេខ២៣៣ (របស់ថ្នាក់ដឹកនាំនៃសមាគមនេះ)។ 
 

តាមរយៈសំណេរក្នុងបណ្តាញតេឡេក្រាម សម្តេច ហ៊ុន សែន អះអាងថា សម្តេច បានណែនាំលោក កើត រិទ្ធ រដ្ឋមន្ត្រីក្រសួងយុត្តិធម៌ ឲ្យធ្វើការជាមួយតុលាការខេត្តរតនគីរី ដើម្បីលើកលែងការចោទប្រកាន់ (លើថ្នាក់ដឹកនាំសមាគមកសិករ) និងផ្តល់សិទ្ធិឲ្យសមាគមនេះ បានធ្វើសកម្មភាពឡើងវិញឲ្យបានឆាប់៕