បើតាមរយៈរបាយការណ៍មួយ ពីសំណាក់អ្នកកាសែតមួយរូបឈ្មោះ Cesar Luis Merlo ក្លិប Inter Miami ត្រូវការផ្លាស់ប្តូរនូវប្រព័ន្ធគ្រប់គ្រង ដើម្បីស្វែងរកទម្រង់លេងរបស់ក្រុមដ៏គួរឱ្យចាប់អារម្មណមួយ បន្ទាប់ពីការចាប់ផ្តើមរដូវកាលដ៏អាក្រក់បំផុត។ 
 

រដូវកាល ២០២២-២៣ Inter Miami ស្ថិតក្នុងក្របខណ្ឌ Major League Soccer ឆ្លងកាត់ការប្រកួតចំនួន ១៧លើកពួកគេរកបានជ័យជម្នះតែ ៥លើកតែប៉ុណ្ណោះ ឈរនៅបាតតារាងលីគកំពូលអាម៉េរិក Major League Soccer ភាគខាងកើត ឬ (MLS Eastern Conference)។
 

បើតាមការបង្ហោះរបស់អ្នកកាសែត Luis Merlo នៅលើបណ្តាញសង្គម Twitter របស់ខ្លួន លោក Gerard Martino សញ្ជាតិអាហ្សង់ទីន នឹងត្រូវបានតែងតាំងជាអ្នកចាត់ការថ្មីរបស់ក្រុមដែល Messi ទើបនឹងផ្លាស់ទៅលេងក្នុងពេលដ៏ឆាប់ខាងមុខនេះ។
 

«Inter Miami បានឈានដល់កិច្ចព្រមព្រៀងជាមួយនឹងលោក Gerard Martino ហើយលោកក៏បានត្រៀមខ្លួនរួចរាល់សម្រាប់ការដឹកនាំក្រុមថ្មី។ ប្រសិនបើរូបលោកទទួលបានទិដ្ឋការសម្រាប់ការងាររួច ក្លិបក៏រំពឹងថាគ្រូបង្វឹកថ្មីនឹងចូលមកដឹកនាំនៅដើមខែ កក្កដាតទៅ។»។ នេះជាអ្វីដែលលោក Merlo បានលើកឡើង។
 

Lionel Messi បានចុះកិច្ចសន្យាទៅលេងឱ្យក្លិបស្ថិតនៅក្នុងលីគ MLS ហើយត្រូវបានរំពឹងថានឹងបង្ហាញខ្លួនលើកដំបូងនៅក្នុងខែសីហា នៅពេលដែលរដូវកាលចាប់បន្ត បន្ទាប់ពីឈប់សម្រាកពាក់កណ្តាលរដូវកាល។ Messi ធ្លាប់ធ្វើជាកូនក្រុមរបស់លោក Martino ឬរហ័សនាម Tata កាលនៅ Barcelona ហើយរូបគេរកបានគ្រាប់បាល់ចំនួន ៤១គ្រាប់ ពីការបង្ហាញខ្លួន ៤៦ប្រកួត៕