កាលពីថ្ងៃទី២០មិថុនា សម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃ និងលោក កើត រិទ្ធ រដ្ឋមន្រ្តីក្រសួងយុត្តិធម៌ បានចូលទៅជួបគណៈកម្មការនីតិកម្ម និងយុត្តិធម៌នៃរដ្ឋសភា ដើម្បីការពារសេចក្តីព្រាងវិសោធនកម្មច្បាប់ស្តីពីការបោះឆ្នោតនេះ។ 
 

ខ្លឹមសាររួម​ ដែលត្រូវបានតាក់តែងឡើងក្នុងសេចក្តីព្រាងវិសោធនកម្មខាងលើ គឺ អ្នកដែលមិនទៅបោះឆ្នោត នឹងមិនមានសិទ្ធិឈរជាបេក្ខជនឲ្យគេបោះឆ្នោត សម្រាប់ការបោះឆ្នោកលើកក្រោយឡើយ។ ការធ្វើវិសោធនកម្មច្បាប់នេះ ហាក់ដូចជា រុញអ្នកប្រឆាំងឲ្យទៅបោះឆ្នោតដែរ ពីព្រោះថា បើមិនទៅបោះឆ្នោត ពួកគេ នឹងមិនអាចឈរឈ្មោះឲ្យគេបោះឆ្នោតនៅពេលក្រោយនោះទេ។ 
 

 ក្រសួងមហាផ្ទៃ និងក្រសួងយុត្តិធម៌ ចាប់ផ្តើមរួមគ្នាសរសេរមាត្រាថ្មីនេះ ដាក់ចូលទៅក្នុងច្បាប់បោះឆ្នោតយ៉ាងឆាប់រហ័ស តាមការណែនាំរបស់សម្តេចនាយករដ្ឋមន្រ្តី ហ៊ុន សែន។ សម្តេចប្រមុខរដ្ឋាភិបាល ប្រកាសជាសាធារណៈថា សេចក្តីព្រាងវិសោធនកម្មច្បាប់បោះឆ្នោតនេះ ត្រូវរៀបចំឲ្យលឿន ដើម្បីក្លាយជាច្បាប់ឲ្យបានមុនការបោះឆ្នោតជាតិនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣។ 
 

ក្នុងការបោះឆ្នោតជាតិលើកទី៧ខាងមុខនេះ មានគណបក្ស១៧ ដែលនឹងចូលរួមប្រកួតជាមួយគណបក្សប្រជាជនកម្ពុជា ដែលជាគណបក្សកាន់អំណាចដ៏ខ្លាំងក្លា។ ឯគណបក្សភ្លើងទៀន ដែលត្រូវចាត់ទុកជាគណបក្សជំទាស់លេចធ្លោជាងគេនោះ មិនត្រូវអនុញ្ញាតឲ្យចូលរួមប្រកួតឡើយ ដោយសារបាត់ប្រកាសដើមស្តីពីការចុះបញ្ជីគណបក្សនៅក្រសួងមហាផ្ទៃ៕