ជាតិ
សង្គមជាតិ
អាជ្ញាធរចាប់បានរថយន្តដឹកគោក្របី៤០ក្បាលខុសច្បាប់ចេញពីថៃ រូបភាពពីហ្វេសប៊ុក លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល
× អាជ្ញាធរ ចាប់បានរថយន្តមួយគ្រឿងដឹកគោក្របីរស់ចំនួន៤០ក្បាលពីថៃ មកចែកចាយនៅកម្ពុជាដោយខុសច្បាប់ នៅម៉ោង១ទៀបភ្លឺ ថ្ងៃទី២១ ខែមិថុនា។ បើតាមលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល រថយន្ត១គ្រឿងនោះ បានធ្វើផ្ទុយពីលិខិតអនុញ្ញាត ដែលម្ចាស់សត្វស្នើសុំដឹកជញ្ជូនសត្វចេញពីថៃ ឆ្លងកាត់កម្ពុជា ទៅកាន់វៀតណាមប៉ុណ្ណោះ។
តាមហ្វេសប៊ុកលោក ហ៊ុន សារ៉ាត់ ដដែល រថយន្ត១គ្រឿងនោះ ម៉ាក HYUNDAI ជាប្រភេទរថយន្តសណ្ដោងរ៉ឺម៉កចំណុះ១៦តោន ពាក់ស្លាកលេខត្បូងឃ្មុំ៣A-២៣២១ បានដឹកគោក្របីចំនួន៤០ក្បាលពីថៃ ចូលមកកម្ពុជាតាមច្រកអូរបីជាន់ស្រុកអូរជ្រៅ ខេត្តបន្ទាយមានជ័យ ហើយបន្តទៅចែកចាយនៅរាជធានីភ្នំពេញ។
រូបភាពពីហ្វេសប៊ុក លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល
យ៉ាងណាសមត្ថកិច្ចបានឃាត់ចាប់រថយន្ត១គ្រឿងនោះ នៅលើផ្លូវម៉ៅសេទុង សង្កាត់ទឹកល្អក់២ ខណ្ឌទួលគោក រាជធានីភ្នំពេញ ដោយពិនិត្យឃើញល្មើសលិខិតអនុញ្ញាត ដែលម្ចាស់សត្វស្នើសុំដឹកជញ្ជូនសត្វគោក្របីរស់ចេញពីប្រទេសថៃ ឆ្លងកាត់ប្រទេសកម្ពុជា ទៅកាន់ប្រទេសវៀតណាមប៉ុណ្ណោះ។ នេះបើតាមលោក ហ៊ុន សារ៉ាត់។
ចំពោះបទល្មើសនេះ អាជ្ញាធរបានយកវត្ថុតាងទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់៕
រូបភាពពីហ្វេសប៊ុក លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល
រូបភាពពីហ្វេសប៊ុក លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល
© រក្សាសិទ្ធិដោយ thmeythmey.com