អន្តរជាតិ
រដ្ឋមន្ត្រីការបរទេសអាមេរិក លោក Antony Blinken នាជំនួបជាមួយមេដឹកនាំចិនលោក Xi Jinping នៅក្រុងប៉េកាំង កាលពីថ្ងៃទី១៩ ខែមិថុនា។ រូបថត AP
×![]()
ដោយ: សារព័ត៌មានថ្មីៗ
ចិន នាថ្ងៃពុធ ទី២១ ខែមិថុនា នេះ បានចាត់ទុកការប្រដូចរបស់ប្រធានាធិបតីអាម៉េរិក លោក ចូ បៃឌិន ដែលហៅបានមេដឹកនាំខ្លួនថា ជា «មេដឹកនាំផ្តាច់ការមួយ» ជាសម្តីដែលមានគ្មានហេតុផល និងគ្មានការទទួលខុសត្រូវទាល់តែសោះ។
យោងតាមការផ្សាយរបស់ទីភ្នាក់ងារព័ត៌មាន AP សង្គ្រាមសម្តី បានកើតឡើងមួយថ្ងៃ ចន្ទាប់ការបញ្ចប់ដំណើរទស្សនកិច្ចរបស់រដ្ឋមន្ត្រីការបរទេសអាម៉េរិក លោក Antony Blinken នៅក្រុងប៉េកាំង។
អ្នកនាំពាក្យក្រសួងការបរទេសចិន លោក Mao Ning បានលើកឡើងថា មតិរបស់លោក បៃឌិន នាកម្មវិធីសប្បុរសធម៌មួយនៅរដ្ឋកាលីហ្វនីញ៉ា ប្រាសចាកការពិតទាំងស្រុង និងបំពានយ៉ាងធ្ងន់ធ្ងរលើពិធីសារការទូត ក៏ដូចជាការបំពានដល់សេចក្តីថ្លៃថ្នូរនយោបាយចិន។
ដំណើរទស្សនកិច្ចរបស់លោក Blinken នៅប៉េកាំង ស្ថិតក្នុងគោលបំណងបន្ធូរបន្ថយភាពតានតឹងរវាងមហាអំណាចពិភពលោកទាំងពីរ ប៉ុន្តែមើលទៅទំនងជាមិនទទួលបានលទ្ធផលជាដុំកំភួនអ្វីនោះឡើយ។
លោក បៃឌិន នាកម្មវិធីរៃអង្គាសថវិកាមួយ បាននិយាយថា លោក ស៊ី រងនូវការអាម៉ាស់ចំពោះភាពតានតឹងនាពេលថ្មីៗនេះជុំវិញបាឡុងចារកម្មចិនដែលត្រូវបានសង្ស័យថាត្រូវបានបាញ់ទម្លាក់ដោយកងទ័ពអាកាសនៅឆ្នេរខាងកើត។
«នោះជាការអាម៉ាស់យ៉ាងខ្លាំងសម្រាប់ជនផ្តាច់ការ នៅពេលដែលពួកគេមិនដឹងថា មានអ្វីត្រូវកើតឡើង»។ នេះបើតាមការដកស្រង់សម្តីរបស់លោក បៃឌិន ដោយ AP។
ក្នុងសន្និសីទសារព័ត៌មាន អ្នកនាំពាក្យក្រសួងការបរទេសចិន បានរំលឹកឡើងវិញថា បាឡុងដែលត្រូវបានបង្ហោះនោះ គឺក្នុងគោលបំណងស្រាវជ្រាវផ្នែកឧតុនិយម ប៉ុន្តែវាត្រូវបានផ្ទុះធ្លាយដោយចៃដន្យ៕
© រក្សាសិទ្ធិដោយ thmeythmey.com
